Este domingo 20 celébrase na Praia de Patos a primeira proba da liga Galega de Surf Junior e Grom na que competirán as categorías Sub 10 mixto, Sub 12/14 masculino e feminino. A proba está organizada pola Federación Galega de Surf e Bodyboard, Prado Surf Escola e o Concello de Nigrán.
Hai dúas semanas que se celebrou en Patos a primeira parte desta primeira proba do ano da liga Galega de Surf Junior e Grom, na que non puideron competir as categorías inferiores por coincidir en datas coa Fesurfing Junior Series Kids 2022 de Murcia. O pasado martes a Federación Galega de Surf e Bodyboard deu luz verde para celebrar este domingo 20 esta segunda parte da proba, na que competirán as categorías Sub 14/12 masculina e feminina e Sub 10 mixto, esta última é unha nova categoría introducida este ano por primeira vez.
A previsión de ondas para esta fin de semana é boa e por iso espérase ver un alto nivel na competición das novas promesas do surf galego. O evento está organizado pola Federación Galega de Surf e Bodyboard, Prado Surf Escola e o Concello de Nigrán. Ademais, a proba conta co apoio dos patrocinadores Alumisel, Auga Sa e Clínica Dental Fontán & DeBrito, e coa colaboración especial de Waira Surf, We are Walcott, Xunta de Galicia e Deporte Galego.
Ademais, con motivo do día do pai este próximo sábado Prado Surf Escola regala un bono aos pais dos seus alumnos para facer un bautismo de surf gratis en calquera das súas escolas: Patos, A Lanzada e Bastiagueiro. Esta iniciativa comezou xa o ano pasado co día da nai na que se apuntaron máis de 20 nais de alumnos en todos os centros.
