O Club Baloncesto Nigrán organiza a VII edición do Torneo «Basket sen Barreiras» que se celebrará os días 3 e 4 de abril no Pavillón Municipal de Panxón. A iniciativa va máis aló dun simple torneo de basket xa que busca, ao mesmo tempo, cumprir unha importante función social e solidaria como é recadar fondos para colaborar con BICOS DE PAPEL, asociación de Familiares de nenos e nenas que reciben tratamento oncolóxico no Hospital Álvaro Cunqueiro, polo que cada participante realizará a súa inscrición achegando un donativo.
O torneo desenvolverase ambos os días en horario de mañá e tarde e para iso habilitaranse 3 pistas no pavillón nas que xogarán os equipos dos diferentes clubs participantes nas categorías infantil, cadete e júnior en horario de mañá, e as categorías alevín, benjamín e baby, en horario de tarde.
Todos os encontros contarán con árbitros do Comité da Federación Galega de Baloncesto que, coma xa vén sendo habitual desde edicións anteriores, colaboran de forma desinteresada no Torneo.
Cada xogador participante realizará un donativo a modo de inscrición que será depositado na urna que se atopará no pavillón durante os dous días de torneo. Todas as familias de xogadores así como o resto de persoas asistentes poden colaborar con este fin solidario achegando o seu donativo tamén na devandita urna.
O Torneo conta coa colaboración da Fundación “A Caixa” e do Concello de Nigrán.
Durante os dous días de competición realizaranse sorteos de diferentes agasallos entre os asistentes. Todo o recadado coa venda das rifas para participar nestes sorteos así como o recadado na urna solidaria será entregado unha vez finalizado o Torneo a BICOS DE PAPEL.
