O Concello de Nigrán ofrece ‘Música nas Parroquias’ por terceiro ano consecutivo, un programa municipal que servirá para colaborar na celebración de todas as festas patronais do municipio, moitas delas organizadas ao 100 % desde o consistorio ao non terse constituído comisións. Destes cartos, a Deputación de Pontevedra achegará 10.000 € a través da Liña 2 do Plan Concellos. Igualmente, o Concello amplía a súa axuda ás verbenas aportando unha orquestra e un trío a cada evento.
Así, este programa municipal arrancará o sábado 11 de xuño para celebrar o Santísimo Cristo da Victoria en Chandebrito, onde ofrecerá unha actuación do Trío Xtra e Orquesta Alkar a partir das 22:30 horas e, ao día seguinte, a Agrupación Musical de Belesar realizará un pasarrúas e concerto a mediodía despois da Misa. As seguintes citas serán San Xoan de Panxón o 24 de xuño, San Pedro da Ramallosa o 29 de xuño, Santiago de Parada o 25 de xullo, O Carme de Lourido o 31 de xullo, San Fiz de Nigrán o 1 de agosto, Virxe das Angustias de Nigrán o 21 de agosto, San Roque de Camos o 24 de agosto e, finalmente, Bo Xesús de Priegue o 4 de setembro.
“Iniciamos este programa co Covid-19 para poder manter as festas pese a ausencia de comisións organizadoras e apostamos pola súa permanencia para garantir a pervivencia das festas tradicionais de Nigrán porque son os verdadeiros días de celebración conxunta da veciñanza e de ledicia en cada parroquia”, resume o alcalde, Juan González.
