A escola de teatro municipal de Nigrán pechará o curso este sábado cunha gran gala teatral na que os máis de 40 alumnos e alumnas mostrarán as obras nas que levan traballando os últimos dous meses. O pano abrirase ás 19.00 horas no auditorio municipal e a entrada será de balde.
Todos os grupos da escola, desde os peques de tres a cinco anos ata os máis adultos, presentarán pezas de microteatro compostas por eles mesmos ou por profesorado da escola. Teatro do Ar, o grupo de Nigrán que aposta por facer teatro orixinal dende o municipio, tamén quere que o alumnado da súa escola traballe con esta mesma filosofía. “Así, ademais de mellorar o noso talento teatral, traballamos outras habilidades como a imaxinación, a creatividade e a diplomacia”, destacan.
A escola teatral do Concello de Nigrán naceu no 2021 da man de Teatro do Ar e o Goberno Municipal e nos dous anos que ten de existencia case 100 persoas puideron iniciarse no teatro. O alcalde de Nigrán, Juan González, tamén aproveita para dar os seus parabéns ao alumnado polo seu gran traballo e indica “que agora pechamos o pano para unhas merecidas vacacións, pero que a escola volverá con máis forza no vindeiro outono”.
