Un incendio declarado onte ao mediodía nunha vivenda no termo municipal pontevedrés de Baiona saldouse cunha persoa trasladada ao centro hospitalario de referencia e diversos danos materiais.
Segundo a información facilitada aos xestores do 112 polo particular que chamou ao Centro Integrado de Emerxencias de Galicia, víase saír fume negro dende o interior dunha casa no lugar da Percibilleira.
De acordo co seu relato, o único ocupante do inmoble estaba fóra da vivenda e atopábase indisposto. Ademais, debido á celeridade coa que se propagaban as lapas, temíase que o incendio puidese afectar ás edificacións lindeiras.
Os feitos sucederon no camiño do Rolan ao fío das 15:00 horas.
A partir de aí, desde o 112 Galicia solicitouse a intervención dos Bombeiros de Vigo e do Porriño, dos membros do GES de Val Miñor, dos profesionais de Urxencias Sanitarias de Galicia-061, dos axentes da Policía Local e tamén púxose a situación en coñecemento de Protección Civil de Val Miñor.
Unha vez no punto, os equipos de intervención trataron de controlar as lapas e extinguir o incendio. Ademáis, confirmaron ao 112 Galicia que unha persoa tivo que ser evacuada polos servizos sanitarios e que a cociña da vivenda resultou totalmente calcinada. As demais estancias da vivenda víronse afectadas polo fume.
