O Concello de Baiona realiza traballos de reparación no CEP Sabarís

Os traballos desenvólvense dentro da liña de colaboración que o Goberno local mantén cos colexios do municipio

O Concello de Baiona está a realizar traballos de reparación e mellora da fachada do CEP Sabarís, unha actuación que a dirección do colexio trasladoulle ao concelleiro de Educación, Óscar Carreño, e que o Goberno local acomete dentro da liña de colaboración que mantén aberta cos centros educativos do concello.

O responsable da Concellería de Vías e Obras, Óscar Martínez, explica que as obras centraranse, primeiro na reparación da zona que presenta grietas de cara a evitar tanto o deterioro da mesma coma as posibles filtracións de auga. Unha vez rematada esa fase, procederase ao pintado de toda esa fachada.

Pese a que estes traballos de reparación non son unha competencia estritamente municipal, senón que corresponderían á Consellería de Educación, realízanse “porque as necesidades dos veciños e veciñas non entenden de competencia e a nosa obriga, como administración máis achegada á cidadanía é darlle resposta a esas necesidades”, afirma o alcalde Carlos Gómez.