En vindeiras datas comezarán en Baiona os traballos de substitución do actual alumeado da rúa Elduayen por luminarias led, actuación que se enmarca dentro dun plan global para acadar a optimización enerxética do municipio coas vantaxes que iso supón dende o plano medioambiental e económico.
Os traballos, que se desenvolverán ao longo de toda a fachada litoral de Baiona dende a rúa Alférez Barreiro ata o remate da rúa Elduayen, permitirán substituír as actuais lámpadas das ‘farolas fernandinas’ por outras baseadas na tecnoloxía led. A actuación non só redundará nunha mellora no alumeado, cos conseguintes beneficios para veciñas e veciños, senón tamén unha importante redución das emisións de CO2 e un aforro considerable na factura eléctrica.
Do investimento global xestionado pola Deputación de Pontevedra, un 80 % correrá a cargo do IDAE (Instituto para a Diversificación e o Aforro da Enerxía), un 10 % corresponderá á Deputación e o 10 % restante será a achega do Concello de Baiona.
Esta actuación da rúa Elduayen, apunta o concelleiro de Vías e Obras, Óscar Martínez, “é un primeiro paso dun ambicioso proxecto de optimización enerxética do municipio”. Así, nunha próxima actuación, traballarase nesa liña na Casa do Concello e, finalmente, optimizarase o alumeado público de todas e cada unha das parroquias.
Os traballos, afirma o alcalde de Baiona, Carlos Gómez, “amosan o compromiso deste Goberno coa loita pola optimización enerxética do municipio que, amais dun compromiso claro coa mellora dos servizos que se lle prestan á cidadanía, reafirma a nosa postura na loita contra o cambio climático e a prol do medioambiente”.
De feito, explica o rexedor baionés, “a substitución do alumeado tradicional de vapor de sodio por lámpadas led, permite reducir a coñecida como ‘contaminación lumínica’ ao permitir focalizalo nas zonas que o necesitan”. Do mesmo xeito, engade Carlos Gómez, “o seu consumo é moi inferior e non só se traduce nun aforro no presuposto enerxético, senón que a maior vida útil do led tradúcese evitar o gasto que supón o cambio das lámpadas e o tempo do persoal dedicado a estes traballos”.
