O alcalde de Baiona, Carlos Gómez, fixo esta fin de semana un repaso, amplo e detallado, do primeiro ano de mandato do seu Goberno, un tempo marcado fundamentalmente pola crise da COVID-19 e por unha “nefasta herdanza” de dous décadas de gobernos do PP.
Gómez repasou, na primeira do encontro coa prensa, a situación atopada polo novo Goberno tras a toma de posesión, un primeiro análise no que constatouse “principalmente un deterioro moi grande no funcionamento interno”. O rexedor amosouse rotundo ao afirmar que “para garantir os dereitos dos nosos veciños e veciñas había que garantir os dereitos dos traballadores e traballadoras”.
Segundo sinalou Carlos Gómez, o Concello ten xa un borrador de convenio colectivo “pendente dun recurso presentado sobre as eleccións de setembro” que, unha vez que se solución “poderemos facer a Mesa de Negociación para levar a cabo da sinatura deste documento, fundamental para garantir os dereitos dos traballadores e traballadoras” e que abrirá a porta da elaboración dunha Relación de Postos de Traballo da que tamén carece o Concello.
A partir de aí, o alcalde de Baiona pasou a centrarse na situación do servizo de limpeza que é, para o rexedor local, unha boa mostra da situación herdada e que deixa ben as claras que o Concello “non está a altura das necesidades que piden dos nosos veciños e veciñas e incluso as necesidades que debe ter un concello que é referente internacional de turismo”. Recoñeceu Gómez que a solución a este problema “está moi condicionada pola ausencia dunha RPT” que segundo o alcalde de Baiona “os gobernos conservadores que estiveron neste concello durante 20 anos consecutivos, non foron quen de solucionar”.
Pese á crise da COVID-19 “que o condicionou absolutamente todo”, dixo o alcalde, “este grupo de goberno sacou adiante 11 proxectos neste primeiro ano dos que 9 son das nosas parroquias e dous do casco urbano de Baiona coa colaboración da Deputación de Pontevedra a través do Plan Concellos”. Aproveitou o rexedor baionés para pedir á Xunta de Galicia “que comece a axudar aos concellos” que, durante a crise do coronavirus “foron os grandes esquecidos por parte dos responsables da sanidade pública, neste caso, da Consellería de Sanidade”. Ese esquecemento, engadiu Gómez, “fixo que durante a crise, este concello gastou preto de 200.000 euros”. “Non lle estamos pedindo á Xunta que bote unha man ao concello, senón aos veciños e veciñas”, matizou o alcalde de Baiona.
Nesa liña, Gómez lembrou que os gobernos conservadores de Baiona dedicaban todos os anos a servizos sociais 18.000 euros e lamentou que “sendo eu portavoz da oposición, tivera que escoitar ao portavoz e alcalde do PP, Ángel Rodal, jactarse de que non se gastaba esa partida”. Nos orzamentos que estaban preparados antes da crise da COVID-19, incluíase xa unha partida orzamentaria para servizos sociais de 40.000 euros e “a estas alturas non descartamos que se suba ata os 60.000 euros porque a situación actual vai mudar logo da época estival e temos que estar preparados para atender ás necesidades dos veciños e veciñas”.
Dentro dos proxectos máis inminentes, o alcalde de Baiona salientou dos “proxectos necesarios e urxentes que se teñen que facer nas parroquias, con camiños, estradas e rúas en estado lamentable”.
Hai tamén lugar, nos proxectos do Goberno local, proxectos de calado e ambiciosos, como é a modificación do proxecto de rehabilitación da Casa de Teresinas para ampliación da Casa do Concello “un proxecto do Goberno do PP que foi rexeitado por Patrimonio, organismo co que estamos traballando para facer as modificacións pertinentes e poder acceder a unha subvención”. Cómpre salientar que se trata dun proxecto de preto dos 2.700.000 euros que precisará, como sinalaba Carlos Gómez, “a colaboración de varias administracións”.
Remodelación da Palma e do paseo Pinzón “que leva anos en situación lamentable”; remate da Praza de Santa Liberata para poder poñer en valor un espazo de enorme importancia patrimonial no que tamén se adopa a excolegiata de Santa María.
Repasou detalladamente Carlos Gómez as actuacións realizadas polo Concello na crise da COVID-19 como desinfección de lugares públicos, accesos a supermercados, farmacias, centro de saúde; apoio ás persoas maiores onde incluso de tramitou a solicitude de levar medicamentos a casa; medidas de atención a colectivos en risco de exclusión, realizada en colaboración con Protección Civil, unha iniciativa pola que o alcalde aproveitou para “agradecer públicamente a todos os veciños e veciñas que se prestaron voluntariamente a levar este tipo de accións”. A todas estas medidas, engadíronse iniciativas como as actividades deportivas e culturais postas en marcha nas redes sociais e “medidas de exención fiscal e pagamento de taxas para empresas e autónomos aos que a crise afecta duramente”.
Por último, Carlos Gómez falou do estudo do Plan de Reactivación Económica “no que sentaremos aos sectores sociais, veciñais, políticos, empresariais e comerciais do municipio”. O alcalde de Baiona quixo aclarar que os plans de reactivación “non implican que a administración local se teña que facer cargo, como dí o sr. Rodal, de subvencións para contratación de persoal de veciños e veciñas, algo que compete a outra administración” e engadiu que “a ver se se entera o sr. Rodal e compañía de que as competencias en comercio, turismo, transporte son da Xunta de Galicia, non se lle pode pedir a unha administración local que se faga cargo diso”.
