Carlos Gómez Prado, candidato socialista á reelección como alcalde de Baiona, avanza que “no próximo mandato queremos que a Casa da Navegación de Baiona forme parte de Rede de Museos Estatais, xa iniciamos as xestións tras as reformas levadas a cabo neste mandato”.
“Xa desde a campaña electoral de 2019 manifestei a miña intención de potenciar a xesta colombina, de poñela en valor con novas iniciativas que beneficien á nosa vila”, explica.
Dentro do proxecto europeo ‘Exploraterra’, encargado de divulgar as grandes travesías transoceánicas peninsulares da historia, a Casa da Navegación conta desde o ano pasado cun novo espazo que ofrece experiencias de realidade virtual aos visitantes. Tamén dentro de ‘Exploraterra’ chegou a renovación do Museo Flotante Carabela La Pinta.
A Rede de Museos Estatais está composta por 16 instalacións xestionadas polo Ministerio de Cultura, como o Museo Nacional de Arqueoloxía Subacuática de Murcia; o Museo Nacional de Cerámica de Valencia, ou o Museo Sefardí de Toledo.
A inclusión da Casa da Navegación nesta rede suporía unha maior proxección nacional, formando parte de actividades e iniciativas conxuntas para todos os museos.
“Atopo moita receptividade e interese neste tema en todas as institucións, xa está en marcha ademais a Asociación de Cidades Colombinas, un proxecto intenacional co obxectivo de ser Patrimonio da Humanidade, conectando os pobos colombinos de España, Sudamérica e África. Con este proxecto ambicioso dotaremos de contido real o irmandamento”, remata Gómez Prado.
