O alcalde de Baiona, Carlos Gómez e a concelleira de Igualdade, Yasmina Moreira, fixeron entrega esta mañá dos diplomas ás mulleres participantes nos cursos de Manipulación de Alimentos, Informática Básica e Atención ao Público, iniciativas que se desenvolveron ao abeiro do Programa de Activación para o Emprego.
Nos cursos, que se desenvolveron nos meses de novembro e decembro, participaron un total de 38 mulleres –18 no curso de Manipulación de Alimentos, 12 no de Informática Básica e 8 no curso de Atención ao Público–.
A iniciativa posta en marcha pola Concellería de Igualdade co financiamento da Deputación de Pontevedra, tiña como obxectivo fomentar a inclusión social e laboral das mulleres do concello, especialmente daquelas pertencentes a colectivos con maiores dificultades.
O traballo levado a cabo para mellorar a súa empregabilidade incluíu ademais destes cursos, 13 sesións de traballo grupal (con visitas a empresas, charlas de responsables de RRHH,…) 138 sesións de carácter individual e un intenso traballo de prospección coas empresas da zona.
Todo isto deu como resultado que o 25 % das mulleres participantes xa atopou emprego ademais dalgunha outra que inda está participando en procesos de selección, ou que outras fosen seleccionadas en itinerarios formativos de longa duración.