7.6 C
Pontevedra
Venres, 29 de Marzo de 2024
Máis
    HomeComarcasRedondelaRedondela reforza a Policía Local coa incorporación de dous novos axentes

    Redondela reforza a Policía Local coa incorporación de dous novos axentes

    Nos vindeiros meses outros seis axentes realizarán a súa formación na AGASP para poder contar, a finais de ano, cun cadro de persoal de 27 policías

    O Concello de Redondela vén de incorporar ao cadro de persoal da Policía Local, dous novos axentes unha vez que superaron o curso realizado na Academia Galega de Seguridade Pública (AGASP) e concluído o seu período de prácticas. Os dous axentes foron recibidos na Casa do Concello pola alcaldesa, Digna Rivas, e o concelleiro de Seguridade, Leonardo Cabaleiro, que lle deron a benvida ao cadro de persoal municipal. Con esta dobre incorporación, Redondela conta cun total de 20 efectivos entre mandos e axentes de policía.

    A estes dous axentes engádense, dende mediados do pasado mes de xaneiro, catro auxiliares de Policía Local, que permanecerán desenvolvendo o seu traballo en Redondela ata o mes de xuño, de cara a reforzar o cadro de persoal logo das xubilacións anticipadas.

    Digna Rivas subliñou que, para o Goberno que preside “a seguridade cidadá e un tema prioritario” e incidiu na necesidade de contar “cunha Policía Local acorde á importancia de Redondela como cuarto municipio da provincia”.

    Nesa liña, a rexedora local adiantou que dende o vindeiro día 12 de marzo, outros seis axentes formaranse na Agasp para, unha vez completado ese período e realizadas las preceptivas prácticas, incorporarse ás filas da Policía local. Dese xeito, explicou Rivas, “a final de ano, Redondela poderá contar cun total de 27 axentes”.

    O cadro da Policía redondelá podería acadar a trintena de axentes de cubrirse as dúas prazas designadas polo sistema de mobilidade no que xa se seleccionaron ditas prazas pero que aínda non tomaron posesión das mesmas.

    Trátase, rematou a alcaldesa Digna Rivas, “de dotar ao municipio dunha Policía Local acorde a importancia do mesmo tanto en medios humanos como materiais para, dese xeito, poder garantir a seguridade da veciñanza e dos seus bens”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.