O Concello de Redondela iniciará en próximas datas os traballos de mellora e acondicionamento das áreas infantís do municipio co fin de mellorar as zonas de esparexemento dos máis pequenos e pequenas e que poidan gozar do seu ocio nas mellores condicións de seguridade.
Os traballos, que terían que empezar no mes de marzo, tiveron que ser aprazados polo decreto de Estado alarma e posteriormente o proxecto tivo que ser redefinido ao comprobar os técnicos que as instalacións estaban en peores condicións das inicialmente previstas.
A alcaldesa de Redondela, Digna Rivas, mostrouse sorprendida polas declaracións do Partido Popular sobre o atraso na apertura destas áreas de esparexemento infantil cando o certo, asegura a alcaldesa, “é que o estado en que se atopan é un reflexo do desinterese dos anteriores gobernos no mantemento destas zonas de lecer. Doutra forma é difícil de entender o grao de deterioración que presenta, por exemplo, unha instalación relativamente nova como o parque da Xunqueira”.
Os traballos que desenvolverá o Concello de Redondela, non se cinguen a un mero ‘lavado de cara’ senón que supoñen a profunda transformación das zonas infantís. De feito para facilitar o tránsito dos usuarios usuarias dentro dos recintos, procederase á recolocación dos distintos elementos e unha vez instalados, procederase á instalación dos elementos amortecedores que garantan a seguridade dos nenos e nenas.
No caso concreto do parque da Xunqueira, substituirase o céspede e o valado perimetral que o rodea xa que se atopa en moi mal estado. Do mesmo xeito, será necesaria a reparación ou substitución, dependendo do caso, dalgúns elementos de xogo debido ás deficiencias que presentan e que poden supoñer un perigo para a seguridade dos nenos e nenas.
En Cerdeira e Cabanas, explica a alcaldesa e unha Rivas, “procederase á reparación dos elementos danados e á substitución das pezas que sexan necesarias, así mesmo contémplase a substitución integral do valado de peche debido ao mal estado que presenta de forma que poida garantir a seguridade dos pequenos e pequenas”.
En todos os parques do municipio, amais das reparacións que se precisen, farase unha limpeza de todo o mobiliario. No Viso, en Escredo cos traballos xa rematados, reparouse a pista de baloncesto e o valado de peche.
Finalmente, a alcaldesa Digna Rivas, sinalou a importancia “de contar cunhas áreas infantís seguras”. “Non se trata de facer remendos ou poñer parches como se facía antes, –asegurou a rexedora local– senón de facer unha obra que garanta, sobre todo, a seguridade dos nosos nenos e nenas e iso está por encima de calquera outra consideración”.
