O vindeiro luns, 14 de setembro, o Concello de Redondela iniciará a distribución de máis de 3.200 máscaras de protección entre o alumnado de infantil, primaria e ESO –o ensino obrigatorio– dos centros públicos do municipio. A concelleira de Educación, Olga García Ballesteros, destacada que esta medida responde á “fonda preocupación” do Concello de Redondela, ante un inicio de curso rexido por un protocolo “claramente mellorable” e no que o Goberno local, aínda carecendo de competencias nesta materia, “fará todo o posible por garantir a saúde e seguridade dos nosos nenos e nenas”.
Nese sentido, a concelleira subliña “a contundencia” dun informe do secretario xeral da Deputación de Pontevedra que sinala textualmente que “a desinfección dos centros escolares por mor da COVID-19 nos centros de infantil, primaria e especial, non son competencia propia dos municipios e supón unha ampliación das mesmas que excede da pura limpeza”.
O informe tamén foi valorado pola alcaldesa Digna Rivas que asegurou que “non fai máis que dar a razón aos concellos xa que a lexislación do Estado nos centros docentes é clara ao sinalar que “as administracións educativas deberán asegurar o cumprimento das normas de desinfección, prevención e acondicionamento” e lembra a alcaldesa de Redondela que o propio informe recalca que “as administracións educativas son o Ministerio de Educación e a Consellería de Educación”.
En todo caso “por responsabilidade”, afirma a rexedora local, “o Goberno local seguirá desenvolvendo todas aquelas medidas preventivas que contribúan a garantir a seguridade dos e das escolares, “independentemente de a quen correspondan as competencias”. “Aos nosos veciños e veciñas –di a rexedora local– impórtalle a saúde dos seus fillos e fillas e non a quen corresponde garantila”.
Vídeo-testemuña de concienciación sobre a COVID-19
Ao mesmo tempo que a entrega de máscaras aos centros escolares, se lles facilitará a cada uno dos colexios unha memoria USB cunha copia do vídeo-testemuña realizado polo Goberno local dentro da campaña de prevención e concienciación contra a COVID-19 ‘Faino por Todxs’. A intención é que dito vídeo sexa difundido entre o alumnado de máis idade.
Esta iniciativa densenvólvese dende o convencemento de que nenos e nenas, sobre todo os de máis idade, precisan concienciarse da situación real que estamos a vivir e da importancia das medidas preventivas, non só para a súa protección, senón tamén para a das súas familias.
Nese sentido o Goberno local amosa a súa confianza en que “a nosa mocidade, que amosou unha conduta exemplar durante o confinamento, seguirá dando mostras da súa responsabilidade”.
