A Praza do Concello de Redondela acolleu, na mañá de onte, a presentación dos Premios Andaina que todos os anos outorga a Asociación Andaina de persoas con diversidade funcional de Redondela e que, por primeira vez, recoñecerán o “traballo e compromiso” do comercio, hostalaría, pequena empresa e entidades á hora de establecer boas prácticas no mundo socio-laboral das persoas con diversidade funcional.
No acto de presentación desta iniciativa social participaron a alcaldesa de Redondela, Digna Rivas; o presidente de Andaina, Antonio García; a concelleira de Servizos Sociais, Iria Vilaboa e o director da oficina de CaixaBank en Redondela, Ricardo Otero.
Os premios, que todos os anos recoñecían o traballo que asociacións e colectivos realizaban a prol da integración das persoas con diversidade funcional dan, tal e como explicaba o presidente de Andaina “un paso máis” ao incluír nos mesmos o traballo, compromiso e labor que realicen o comercio, hostalaría, pequena empresa e entidades no referente á inclusión de boas prácticas en materia de inclusión socio-laboral das persoas diversidade funcional.
“Non só se premia a accesibilidade arquitectónica –explicaba Antonio García– senón que tamén se haberá galardóns para a accesibilidade cognitiva, integración laboral amais de premio para as entidades culturais e deportivas”.
A maiores, seleccionarase unha persoa con diversidade funcional que “teña destacado en calquera ámbito polos seus logros, esforzo ou méritos” e na gala de entrega dos premios que terá lugar a finais de ano, “porase en valor o seu mérito dando a coñecer o seu traballo e buscando espazos onde dar visibilidade as súas capacidades”, explicaba o presidente de Andaina.
Aos Premios Andaina, cuxas bases faranse públicas esta vindeira semana, poderán presentarse todos os proxectos desenvolvidos dende o 1 de xaneiro e o prazo de presentación de solicitudes rematará o vindeiro 30 de xuño.
Digna Rivas, na súa intervención, subliñou o traballo “incansable e imprescindible” que desenvolve a Asociación Andaina “coa que sempre estamos e estaremos dispostos a colaborar en todo o que nos soliciten” xa que, engadía a rexedora local “dende o Goberno local, sempre apostamos por todas aquelas iniciativas que contribúan a integración das persoas con diversidade funcional”.
“Os Premios Andaina son, non só un recoñecemento para as persoas e colectivos galardoados, senón un premio para a propia asociación que traballa arreo a prol da integración social e laboral destas persoas o que se traduce nunha maior calidade de vida para elas e as súas familias”.
Presentados os Premios Andaina 2022 pola accesibilidade e a inclusión social e laboral
Por primeira vez os premios recoñecerán o compromiso e labor do comercio, hostalaría, pequena empresa e entidades en materia de accesibilidade, inclusión e boas prácticas coas persoas con diversidade funcional
LIBROS
A pegada de «Ronsel»
A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.
Dores Tembrás, «Enxertos»
A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades
Queridos Reis Magos…
Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.