8.7 C
Pontevedra
Xoves, 28 de Marzo de 2024
Máis
    HomeComarcasRedondelaO Concello suspende a feira do día 23 ante a grave situación...

    O Concello suspende a feira do día 23 ante a grave situación sanitaria con un continuo crecemento de casos activos por Covid-19

    A feira, que habitualmente celébrase os días 6 e 21 de cada mes, íase trasladar ao sábado 23 para poder pechar ao tráfico a Avenida Mendiño

    Foto de arquivo da feira de Redondela

    O Concello de Redondela anunciou onte a suspensión da feira que tiña que celebrarse o sábado 23 de xaneiro “ante a continua evolución de casos activos por coronavirus no municipio”. A feira que, en circunstancias de normalidade celébrase os días 6 e 21 de cada mes, tiña programado o seu cambio de data para o sábado 23. Agora, os “preocupantes datos sobre o incremento de casos por Covid-19 obrigan á súa suspensión por motivos de seguridade e de responsabilidade”.

    O traslado da feira ao día 23 tiña por obxectivo, tal e como explica o concelleiro de Feiras e Mercados, Vicente Lamas, “ocupar toda a Avenida Mendiño tal e como se fixo o pasado día 6, (algo imposible de realizar nun día laborable), para que os postos poidan gardar maiores distancias entre si e evitar aglomeracións”.

    Porén agora, o continuo ascenso de casos activos por coronavirus, non só en Redondela senón en Galicia, obriga á suspensión desta feira.

    Pola súa banda, Digna Rivas lembra que Redondela, ao igual que moitos dos municipios da área metropolitana, “atópase en nivel de restrición máxima o que supón, entre outras cousas, o peche perimetral” polo que, aclara a alcaldesa redondelá “facer unha feira nunha situación como esta sería unha irresponsabilidade dende o punto de vista sanitario”.

    A rexedora local é perfectamente consciente do trastorno que produce á veciñanza, comercio local e ambulantes, a suspensión dunha actividade “que ten un importante efecto de dinamización na economía local” pero o contacto continuo coa Consellería de Sanidade e os datos que esta aporta “obrígannos a adoptar medidas como esta que non son doadas de tomar”.

    “A seguridade da veciñanza e tentar protexer a súa saúde é a máxima prioridade do Goberno local –afirma a alcaldesa– e para conseguilo adoptaremos todas as medidas precisas que recomenden as autoridades sanitarias tanto da Xunta como do Estado, por moi dolorosas que estas sexan”.

    Digna Rivas fixo un chamamento a veciñas e veciños “a extremar as medidas de prevención nun momento moi complicado, con números que nos sitúan preto do mes de marzo do 2020 e que precisan da colaboración, sensatez e responsabilidade de toda a cidadanía”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.