Redondela prepárase a vivir unha fin de semana chea de deporte cos partidos dos abertos de tenis e pádel ‘Memorial Sesé López’, que se disputarán nas pistas municipais, e a Carreira Popular Infantil.
O aberto de tenis, que comezaba os seus encontros o pasado día 21, entra na súa recta final para todas a súas categorías (feminina absoluta e dobres e masculina +45, absoluta e dobres) para rematar coas finais o domingo 29.
No que ao aberto de pádel fai referencia, disputarase os días 27, 28 e 29 de agosto tanto nas categorías feminina (1ª e 2ª) como na masculina (1ª, 2ª e 3ª).
Doutra banda o sábado 28 de agosto, a partir das 19:30 horas, terá lugar a Carreira Popular Infantil con categorías que irán dende a Sub8 á Sub18. A proba, organizada pola Concellería de Deportes que xestiona Nacho González, conta coa colaboración da Asociación Deportiva CAR (Club Atletismo Redondela).