A alcaldesa de Redondela, vogal da Comisión de Benestar Social e Accesibilidade Universal da FEMP

Digna Rivas reivindicou a necesidade de que Estado e Comunidades Autónomas “axuden aos concellos que están a asumir, nesta pandemia, competencias que non lles corresponden”

A alcaldesa Digna Rivas durante a reunión telemática da Comisión da FEMP

A alcaldesa Digna Rivas participou esta semana na Comisión de Benestar Social e Accesibilidade Universal da Federación Española de Municipios e Provincias (FEMP), da que a rexedora redondelá entrou a formar parte como vogal. A alcaldesa amosou a súa satisfacción polo feito de que “Redondela comece a contar e ter voz naqueles foros nos que se adoptan decisións importantes para os concellos”.

No terceiro punto da orde do día sobre ‘Propuestas de actuaciones relacionadas con la reconstrucción social y económica’, Digna Rivas defendeu a necesidade de que tanto o Estado coma as comunidades autónomas, “axuden aos concellos que nesta pandemia estiveron asumindo competencias que non lle corresponden para que os seus veciños e veciñas, non quedasen desamparados”, afirmou.

Rivas fixo especial fincapé na situación en Galicia na que os concellos tiveron que destinar “a maior parte dos nosos recursos económicos a asuntos relacionados coa COVID-19, tanto no que fai referencia á protección sanitaria das nosas veciñas e veciños, coma a evitar que as familias máis vulnerables quedara desprotexidas”.

A alcaldesa de Redondela considerou “moi importante” a presenza de Redondela nesta comisión da FEMP, “porque é –dixo– poñer en valor a importancia do noso municipio como cuarto da provincia e que nos da a oportunidade de ter voz nun foro de extraordinaria importancia á hora de adoptar decisións que inciden directamente sobre os concellos”.