O Castelo de Dona Urraca ratifica a boa acollida que ten o seu contido museográfico entre veciños e foráneos. Ademais, este espazo de divulgación vitivinícola vese complementado coa inclusión do Punto de Información Turística no interior do Castelo de Dona Urraca, xa que son moitas as demandas de información que o municipio de Salvaterra de Miño recibe acerca dos seus senlleiros recursos turísticos.
Case medio milleiro de persoas visitaron, dende o mes de marzo, o espazo arquitectónico máis representativo de Salvaterra de Miño, o Castelo de Dona Urraca, que prevé triplicar estas cifras durante a época estival. Ademais, as previsións para este outono son moi optimistas xa que o museo conta con numerosas reservas de grupos chegados de diferentes puntos de toda a península.
O elevado volume de visitantes que se achegan ó Castelo de Dona Urraca reflicte o gran interese que o municipio esperta pola variedade e riqueza dos seus puntos turísticos.
O Castelo de Dona Urraca, que alberga o Museo da Ciencia do Viño e tamén o Punto de Información Turística, está aberto de mércores a domingo, no seguinte horario de atención ó público: de 11 h a 14 h e de 17 h a 19 h.
Non será preciso a inscrición previa agás para os grupos de máis de 15 persoas. As reservas para grupos deberán efectuarse a través do teléfono 617.14.88.66 ou no enderezo electrónico: museocienciavino@concellodesalvaterra.org
