O Concello de Ponteaeras mantén aberta a oportunidade de participar no concurso ‘Eu Creo Na Casa’, organizado pola Concellería de Promoción Económica e que ten como finalidade descubrir a potencialidade creativa realizada nas vivendas de todas e todos os ponteareáns durante o estado de alarma, por mor da Covid-19. Esa creatividade será premiada a través so sorteo de 440 vales de compra de 20 € cadanseu e 24 premios extraordinarios de 50 €, que despois deberán gastar no comercio e hostalería locais.
A campaña, que se desenvolve baixo o hashtag #FaiPonteConNós, ten como obxectivo axudar ao tecido económico do concello que está a sufrir os efectos da pandemia. Agora máis que nunca, di a concelleira de Promoción Económica, Eva Gil “é preciso mercar e consumir no pequeno comercio local para que poidan saír adiante”.
Establécense 12 categorías de participación con diferentes persoas gañadoras en cada unha delas. O concurso estará dotado cun total de 10.000 € a investir en todos os comercios do municipio e sector da hostalería e restauración local obrigados a pechar ou que mermaron a súa actividade comercial.
Ata o momento presentáronse máis de 160 creacións por parte da veciñanza, e as categorías con maior participación son a de fotografía dende a casa, artes plásticas, poesía oral e escrita e cociña e receitas, polo que aínda quedan moitos vales por obter. A Concellería lembra que non é preciso ser un experto ou experta en redes sociais nin en vídeo, xa que tamén se pode optar aos vales a través de categorías nas que a veciñanza pode participar con textos, fotografías e debuxos.
bases do consurso e sorteos poden consultarse na páxina web do concello www.ponteareas.gal e nas redes sociais da Concellería de Promoción Económica.
