24.5 C
Pontevedra
Venres, 19 de Xullo de 2024
Máis
    HomeO CondadoPonteareasSilvia Fernández Táboas, primeira muller presidenta da Banda de Música Xuvenil de...

    Silvia Fernández Táboas, primeira muller presidenta da Banda de Música Xuvenil de Xinzo

    Desde este semana, a Banda de Música Xuvenil de Xinzo conta cunha nova directiva na que destaca a súa presidenta, xa que, coa súa incorporación, Silvia Fernández Táboas converteuse na primeira muller que ostenta o cargo desde a fundación da agrupación.

    Na Asemblea Xeral Extraordinaria celebrada o pasado 4 de marzo, o ata entón presidente Francisco Jesús Represas Carrera anunciou a súa decisión de abandonar o cargo xunto con outros membros da Xunta Directiva, polo que esta disolveuse e abriuse o proceso de elección para unha nova. Así pois, este pasado sábado 25 de marzo foi cando Silvia Fernández Táboas presentou ante a asemblea convocada a súa candidatura, conformada tanto por membros da anterior Directiva como por novos.

    Ata este sábado, Silvia Fernández Táboas ocupaba desde o ano 2017 o cargo de tesoureira da agrupación. Agora como presidenta, acompáñana ata cinco membros da anterior Directiva. Deles, dous cambian de cargo: Ángel González Lago, que pasa de vicetesorero a tesoureiro, e Manuel Collazo Francisco, que se converte en secretario tras ocupar durante tres anos o posto de vicesecretario. As tres membros restantes que continúan na nova Xunta Directiva son Ana María Acebedo Varela, Mónica Carrera Táboas e Sonia González Represas, que seguirán cumprindo coa función de vogais.

    Tras as saídas da vicepresidenta Branca Represas, a secretaria María Represas e a vogal Segunda Carrera Iglesias, a nova presidenta incorporou a outros cinco membros máis tanto para suplir estas baixas como para engadir novos cargos á súa Directiva. As novidades máis destacadas son as dúas vicepresidencias que se crean coa incoporación de Alejandro Otero González como vicepresidente primeiro e Manuel García González como vicepresidente segundo. A eles súmanse Uxía Collazo Cobelo no cargo de vicesecretaria e Sara Álvarez Carrera e Javier Otero González como vogais.

    A nova presidenta, coa experiencia adquirida ao exercer como tesoureira da asociación durante o últimos seis anos, en nome de toda a Xunta Directiva, declarou estar “moi ilusionada e con ganas de asumir esta nova responsabilidade na que terei a sorte de compartir proxecto con músicos/as e amigos/as e sobre todo, traballar para conseguir todos os obxectivos marcados para o próximos tres anos e que terán como eixos principais consolidar a transformación dixital no funcionamento da asociación, mellorar a transparencia e igualdade na toma de decisións; a comunicación, cohesión e coordinación coa banda e, sobre todo, gozar facendo música para seguir sendo un referente do ámbito bandístico e cultural da provincia”.

    Ademais, desde a nova Directiva agradecen tanto ao presidente saínte, Francisco Jesús Represas, como ao resto dos membros da anterior Xunta o traballo realizado durante os últimos anos e o seu esforzo e preocupación pola mellora da agrupación.

    FIN DE SEMANA DE ESTREA

    A primeira fin de semana da nova directiva preséntase repleto de actos. Este sábado 1 de abril, terá lugar a audición do segundo trimestre da Escola de Música de Xinzo no Centro Cultural da parroquia ás 18:00h da tarde. Na audición, participarán alumnos das diferentes modalidades da Escola, unha cita na que mostrarán o aprendido durante estes últimos meses a través das súas interpretacións solistas e grupais.

    A música continuará ao día seguinte, o domingo 2 de abril, coa celebración do IV Festival de Corais. Igualmente no auditorio de Xinzo ás 18:00h da tarde, esta cita anual, xa convertida en unha habitual desde 2019, contará coas agrupacións do Coro Cantemos de Salvaterra de Miño e co Coro Voces de Chenlo como convidadas para acompañar á anfitrioa, a Coral Cantares de Xinzo.

    Con estas dúas xornadas cheas de música, a nova Xunta Directiva dará comezo a un período que durará ata 2026, tres anos nos que esperan poder cumprir os obxectivos marcados co fin de que a asociación continúe prosperando.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.