18.5 C
Pontevedra
Xoves, 18 de Xullo de 2024
Máis
    HomeO CondadoPonteareasPonteareas homenaxea o traballo invisible que existe detrás do Corpus no seu...

    Ponteareas homenaxea o traballo invisible que existe detrás do Corpus no seu cartel de 2023

    O ilustrador ponteareán Pablo Prado é o autor do cartel deste ano, no que se representa por primeira vez o deseño das alfombras

    Ponteareas arranca con forza os preparativos do seu tradicional Corpus Christi. A alcaldesa, Cristina Fernández; a concelleira de Turismo e Promoción Económica, Eva Gil; e o concelleiro de Eventos, Miguel Bouzó, presentaron este xoves xunto ao ilustrador Pablo Prado o cartel que será a imaxe dunha nova edición desta festa tradicional.

    “Estamos desexando volver vivir o noso Corpus, unha festividade que destaca polo seu significado histórico e cultural, que nos permite resaltar as nosas tradicións, manter vivo o noso patrimonio cultural, promover o turismo e fomentar unha unión e un traballo colectivo únicos”, salientou Cristina Fernández.

    O cartel anunciador foi deseñado polo ilustrador e caricaturista Pablo Prado, gañador de numerosos premios polo seu traballo no eido da banda deseñada, que recolle na súa creación o traballo invisible que hai detrás do Corpus e que por primeira vez representa o labor do deseño das alfombras. “A imaxe busca destacar o nivel de mobilización das persoas da vila, que se xuntan para realizar un traballo colectivo, anónimo e desinteresado co que enchen de cor as nosas rúas”, salienta o autor.

    Un sentir que espertou nel sendo cativo grazas ao tesón dunha das súas profesoras, que cada ano levaba ao seu alumnado a ver e experimentar o traballo do desfollado en San Gregorio. “Para min era fascinante ver a esas mulleres de todas as idades, a vitalidade, as risas, o ben que o pasaban e todo o seu saber sobre flores e plantas e que tan ben representa o patrimonio inmaterial do noso Corpus”, subliñou. Esa profesora tamén facía os deseños do seu tramo, un traballo que describía sempre con misterio. Unha das súas propostas é a que aparece no cartel, “un deseño real recollido nunha investigación que fixo a miña nai e unha compañeira en 2009 para o colexio no que son profesoras e que recolleu rexistros gráficos de todo ese traballo previo que me serviu de inspiración”.

    Pablo Prado estudou no Garaxe Hermético, a escola profesional de cómic e ilustración de Pontevedra e comezou en 2016 a facer traballos de humor gráfico e caricatura para varios xornais galegos. Foi gañador do premio de banda deseñada do Garaxe Hermético con ‘Nerea e o príncipe da Sorte’, un traballo con guión de Miguel Rojo e publicado pola editorial Xerais. Dende hai anos colabora ademais en proxectos vinculados á loita pola igualdade como a asociación feminista FestiVal das Brétemas ou SOS Racismo Galicia.

    Co deseño de Prado, o Concello aposta unha vez máis por creadoras e creadores ponteareáns para o cartel do Corpus Christi, Festa de Interese Turístico Internacional, o que, como salientou a alcaldesa, “é sen dúbida un grande escaparate de todo o talento, creatividade, orixinalidade e calidade que temos a sorte de ter na nosa vila. É unha forma de involucralos e achegalos de forma directa a unha tradición moi arraigada en Ponteareas e que perdurará durante moitos anos da man das novas xeracións”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.