Ponteareas habilita unha liña de axuda de 10.000 euros para colectivos culturais, veciñais, comunidades de montes e regantes

A concelleira de Vías, Obras e Alumeado, Chus Garrote, anuncou hoxe que xa están subidas na páxina web do Concello as bases e formularios para solicitar as axudas para investimentos destinada a colectivos de interese veciñal, dotadas con 10.000 €.

Para que todas as asociacións veciñais, culturais, comunidades de montes en man común e comunidades de regantes poidan coñecer con suficiente antelación as bases, o Concello adianta toda a información na súa páxina web na pestaña “axudas e subvencións” ou nesta ligazón.

A concelleira socialista explica que por terceiro ano consecutivo as axudas queren contribuir na mellora da calidade de vida local e fomentar e dinamizar o asociacionismo veciñal axudando ás entidades veciñais no financiamento de obras ou equipamentos da súa titularidade ou dos que lles corresponda o dereito de uso.

“As asociacións culturais ou veciñais así como as comunidades de montes ou regantes desenvolven un importante papel na vida social da cidadanía, intensificándose no rural, donde asumen ademais a xestión de servizos básicos e patrimonio natural sendo tamén importantes axentes dinamizadores que velan por bens comúns”.

Chus Garrote adianta que ata que se levante o estado de alarma non poderán ser solicitadas aínda que fosen publicadas hoxe no Boletín Oficial da Provincia esta liña. O adianto das bases faise co obxectivo de que os colectivos beneficiarios poidan traballar con tempo e planificación.