Chega a Ponteareas unha das actividades máis destacadas dos últimos veráns do concello, o “Festival Internacional de Teatro de Rúa”, cuxas actuacións se prolongarán dende o mércores 3 ata o sábado 6 de agosto.
Teatro, música, circo e clown tomarán as rúas de Ponteareas, que se converterán en escenarios destas representacións gratuítas para o público nun festival que alcanza xa a súa quinta edición.
Cristina Fernández, alcaldesa de Ponteareas, sinala que o Festival Internacional de Teatro na Rúa “é un evento xa consolidado que enche as rúas de actividade cultural e de lecer e supón unha oportunidade para dinamizar diferentes espazos de Ponteareas, o que nos reafirma como unha vila viva e activa”.
O concelleiro de Eventos, Miguel Bouzó, anima á veciñanza e visitantes a asistir, destacando que se trata dun festival “que garante catro días de animación e diversión para todos os públicos, cun amplo repertorio de diferentes estilos, dun gran nivel artístico e dunha creatividade que paga a pena coñecer e gozar”.
O festival comezará o mércores 3 ás 19.00 horas, nos xardíns da Xiralda, co “Aviador tolo”, un espectáculo itinerante da Compañía galega Barafunda que partirá dos Xardíns da Xiralda ata rematar na praza Doutor Fernández Vega ás 19.30. A esa hora no mesmo lugar será a quenda do mago galego Noel, que volverá ceder o protagonismo ás 20.30 ao “Aviador tolo” para que realice o seu espectáculo itinerante dende Doutor Fernández Vega ata os xardíns da Xiralda.
O xoves o festival comezará de novo ás 19.00 horas co espectáculo de Barafunda. Esta vez o percorrido partirá da urbanización “Ponteareas cidade” ata o Parque da Feira Vella. Ás 19.30 h as persoas que asistan a dito parque poderán desfrutar da actuación de circo da compañía de Castela e León El Gran Rufus e, dende o mesmo lugar, ás 20.30 horas o “Aviador tolo” levará aos asistentes nun percorrido teatral e musical ata o parque das Pombas.
A compañía galega EducaTeatro abrirá a xornada do venres coa súa itinerante “Festa Xurásica”. Comezará ás 19.00 horas na praza Doutor Fernández Vega, e rematará no parque da Perillana ás 19.30 horas. Nese momento, o espectáculo circense do belga Vanminsel Rudi collerá as rendas do festival para posteriormente cederllo de novo a EducaTeatro noutro percorrido teatral que rematará na Praza Bugallal. O terceiro día do festival pechará con máis circo ás 21.00 horas da man do galego Jano e o seu espectáculo “Sen medidas”.
As actuación do sábado tamén abrirán o pano ás 19.00 horas co espectáculo “Festa Xurásica” de EducaTeatro. Esta vez o percorrido partirá do Parque das Pombas para rematar no Parque da Feira Vella. Alí, media hora máis tarde, volverá o circo coa compañía alemá Al Grano & Jahana Hesse e, ás 20.30 horas, EducaTeatro levará o público coa súa “Festa Xurásica” ata a Praza Maior, que acollerá o peche do festival ás 21.00 coa actuación musical do grupo Breocáns.
