Con máis de dez lustros ás súas costas, o Concurso de Gaitas do País, é o concurso de música tradicional por excelencia e converte, a Ponteareas, en capital indiscutible da nosa música na súa máis pura esencia; compre salientar que só se admiten cuartetos tradicionais formados por dúas gaitas, bombo e tamboril. Con estes antecedentes, o vindeiro sábado 18 de setembro o municipio vestirase de gala para acoller a 54 edición deste certamen que, como sinalabamos, coloca a vila como referente no panorama da música tradicional galega.
Os grupos participantes tocarán en directo no exterior da Casa do Concello de Ponteareas, e ademais, cos seus traxes tradicionais completos (un dos requisitos dende a primeira edición), percorrerán as rúas da contorna coas súas melodías. Durante estes pases o xurado decidirá os gañadores dos catro premios que reparte o concurso, os primeiros recibirán 1.800 euros, os segundos 1.200, os terceiros 900, e os cuartos 600. Ademais, cada grupo participante, agás os gañadores, recibirá unha gratificación de 300 euros.
O Concello organiza este premio para promover e difundir a música tradicional galega. O concelleiro de Cultura, Fernando Groba, expón que “para nós é un orgullo e unha grande oportunidade ofrecer un lugar para que os grupos mostren as melodías que dignifican o folclore galego”. Este ano, ademais, para pechar a festa musical a administración local organiza na noite do sábado 18 de setembro no parque da Feira Vella o concerto de Milladoiro, e o compoñente do grupo Xosé Ferreiros formará tamén parte do xurado do concurso.
Para participar no concurso os grupos que o desexen deben realizar a inscrición no Rexistro de Entrada do Concello de Ponteareas a través da sede electrónica ou a través de calquera das formas previstas no art. 16.4 da Lei 39/2015, de 1 de outubro, do procedemento administrativo común das administracións públicas (LPACAP), de balde.
O prazo de admisión de solicitudes remata o día 10 de setembro de 2021. As bases polas que rexerá o concurso, así como a folla de inscrición e toda a documentación que é preciso presentar pode atoparse nesta ligazón.
