12 C
Pontevedra
Venres, 29 de Marzo de 2024
Máis
    HomeO CondadoPonteareasPonteareas amosa ao mundo ás mans do seu tradicional Corpus

    Ponteareas amosa ao mundo ás mans do seu tradicional Corpus

    “É un orgullo poder presentar por primeira vez ao público un traballo de case un ano que pretende por voz e rostro á nosa festa, o Corpus, pero, sobre todo, pode recoñecer o fantástico labor e esforzo co que todas e todos os alfombristas traballan ano tras ano para manter esta tradición que fai que Ponteareas sexa coñecida máis alá das nosas fronteiras como a vila do Corpus”. Con estas sentidas palabras, a alcaldesa Cristina Fernández daba comezo ao acto de presentación do documental ‘As mans do Corpus’, unha peza audiovisual que amosa “cunha gran sensibilidade o sentir de todas e todos os ponteareáns” por esta festa histórica.

    Este documental recolle o traballo interxeracional e colaborativo entre as e os alfombristas e todo o proceso de planificación, deseño, preparación de material e elaboración dun quilómetro de alfombrado no centro de Ponteareas que é visitado e desfrutado por milleiros de veciños, veciñas e visitantes.

    “Este documental é unha ollada ás historias, ao proceso creativo que hai detrás de cada unha das nosas alfombras. Con el mergullámonos no corazón desta festa que celebramos dende hai máis de 150 anos e que reflicte a riqueza cultural e patrimonial da nosa vila, pero, sobre todo, o sentir de todo un pobo polo noso Corpus”, recalcou a rexedora.

    Cristina Fernández estivo acompañada no escenario polas sete persoas protagonistas, unha representación dos e das alfombristas que recolle o testemuño e poñen voz e rostro a un arte efémero centenario que soubo avanzar e modernizarse para ofrecer tamén un espectáculo festivo e cultural considerado Festa de Interese Turístico Internacional. Alejandro Porto, Ana Fernández, Iago Carrera, Julio González, Maruja Carrera, Miguel Mera e Pilar S. Garra contaron as súas vivencias e experiencias nun coloquio no que tamén participaron os integrante do equipo realizador do documental, Azo Audiovisual, composto por Miguel Fernández, Pablo Kaufman, Pío Cribeiro e Eloy Táboas.

    A alcaldesa quixo dar as grazas a todos os portais alfombristas, “xa que sen eles sería imposíbel manter esta tradición”; agradecer a colaboración das e dos protagonistas do documental, “que representan o sentir e o traballo de todas e todos os alfombristas”; e achegou os seus parabéns ao equipo de produción do documental “polo excelente traballo realizado e por ter a sensibilidade para contar como é e como se vive o Corpus en Ponteareas”.

    O acto rematou coa proxección do documental, que pechou a emotiva xornada cunha grande ovación do público.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.