O Goberno Municipal do BNG e PSOE aprobarán no pleno deste mes de xuño o Plan Xeral de Ordenación Municipal (PXOM) de Ponteareas cos cambios esixidos pola Xunta. Tras a recente convocatoria da comisión informativa, o PXOM levarase a sesión plenaria tras decidir demorar un pouco máis a súa aprobación para que os grupos políticos municipais dispuxeran de máis tempo para analizar o documento e realizar axustes técnicos derivados de cambios recentes na cartografía oficial da Confederación Hidrográfica Miño-Sil.
Con esta será a terceira vez que o Goberno de coalición aprobe de forma provisional o PXOM coa intención de que a Xunta lle dea a súa aprobación definitiva. A última aprobación provisional realizouse a finais de 2019 cando no documento se introduciron os cambios esixidos pola Xunta a comezos de 2017. Non obstante, a administración autonómica, ao revisar o documento volveu formular numerosas obxeccións e reparos que obrigaron a revisar de novo o documento.
Ante ese novo bloqueo, Concello e Xunta acordaron a comezos de 2020 realizar un traballo coordinado entre técnicos municipais, empresa redactora do PXOM e técnicos da Xunta para que o documento definitivo atendese todas as esixencias da administración autonómica. “Queríamos seguridade xurídica para evitar o que aconteceu nas dúas ocasións anteriores, nas que os cambios introducidos por esixencia da Xunta non foron despois validados. Agora, traballando de xeito coordinado, cremos que non hai marxe para novas sorpresas e agardamos que o PXOM sexa aprobado definitivamente pola Xunta antes de que conclúa o verán”, explica a alcaldesa, Cristina Fernández Davila.
Ponteareas ten suspendido o seu plan xeral dende o ano 2002. Entre ese ano e o 2015, cando se produciu o cambio de goberno, unicamente se realizou unha aprobación inicial. Dende o 2015, o goberno de coalición aprobou por dúas veces o PXOM, pero a Xunta de Galicia, que ten a última palabra, rexeitouno nas dúas ocasións. A aprobación prevista para o vindeiro pleno será a terceira nos últimos cinco anos e goberno local confía en que se trate da última e definitiva.