O Grupo Municipal do PP lamenta que o actual goberno non informase da situación das augas no municipio. Os populares consideran que se puxo en perigo a salubridade dos veciños e visitantes que acudiron no último mes á praia fluvial da Freixa.
O PP solicitou os últimos informes e comprobou que no mes de agosto varios parámetros indicaban contaminación nas augas, motivo que sería suficiente para ordenar un peche temporal de zonas de baño como a praia fluvial da Freixa. “Así evitariamos poñer en perigo a ninguén. Con eses indicadores, o lóxico é que se informou e mesmo pechado a praia ao baño”.
Ademais, os populares consideran necesario que as analíticas levadas a cabo polos técnicos municipais deben ser publicadas nos diferentes medios públicos, para información de todos os veciños. “Xa a primeiros de ano solicitamos que se fagan públicos os informes que constantemente se realizan a fontes, vales e zonas de baño do noso municipio. Cuestión que seguen sen corrixir”, explican os populares.