O PP de Ponteareas solicita ao Concello que “axilice” os pagos de facturas pendentes e que non pasen os 30 días

Os populares tamén solicitan duplicar a partida orzamentaria destinada a paliar os efectos da COVID19 xa que o Goberno "propón tan só 500.0000 euros"

O PP de Ponteareas, dentro da batería de propostas que están a facer ao Goberno local para afrontar a crise derivada da COVID-19, vén de propoñar que se axilicen os pagos a provedores “e abónense as facturas pendentes”, xa que os datos facilitados, do último trimestre, aseguran os populares, “reflicten que a administración local atrásase no pago unha media de 54 días, cando a lei establece que deben ser menos de trinta días”.

O PP considera que o alcalde como responsable de Facenda, ten que axilizar estes pagos e liquidar as facturas correspondentes ao ano 2019, por importe de 600.000 euros. “Actualmente ten facturas sen contabilizar e sen pagar por valor de máis de 600.000 euros. Son facturas de 2019 polo que, no mellor dos casos, pertencen ao mes de decembro. É dicir, despois de 150 días seguen sen pagarse. A contabilidade destas facturas incrementaría a media de pago do noso Concello en ata 100 días, moito máis que os 54 publicados no último informe trimestral”, explican os populares.

Os populares solicitan ao Goberno local que “tome nota da proposta” e melloren xa o prazo de pago, porque senón os autónomos e empresas que facturan ao Concello van verse gravemente afectadas nestes meses. “Solicitamos que se cumpra a lei. Que fagan fronte aos pagos cumprindo os prazos establecidos”.

Dupliar a partida orzamentaria para paliar os efectos da COVID-19

Doutra banda, os populares piden do Goberno local que duprique o investimento previsto para paliar os efectos da COVID-19 de 500.000 euros, xustamente ao dobre, un millón de euros. Aseguran “estar sorprendidos” ao coñecer a situación financeira do Concello, que a pesar do pouco investimento realizado en 2019, “pechou o exercicio incrementando os gastos e perdendo o remanente acumulado en 2018”.

Os populares viñan reclamando no último mes que se crease un Fondo Especial, utilizando precisamente o Remanente de Tesourería, que son os aforros do Concello, para afrontar a situación derivada da crise de COVID-19 e agora, que se publicaron os datos, “entenden que non será posible”. Afirma o PP que o Goberno “gastouse o remanente existente e opta por facer unha modificación orzamentaria de máis dun millón de euros. Tendo en cuenta que o destinado a axudas serán 500.000 euros chámanos a atención que a modificación sexa moito maior, sobre todo cando acaban de aprobar un orzamento para este ano que segundo o Goberno local recollía todas as partidas necesarias”, explican os populares.

Por iso, o Partido Popular solicita ao Goberno local a división do expediente. “Queremos que se reflicta o importe exacto que será destinado a axudas derivadas do COVID-19 e coñecer a que se destina o resto da modificación”.

Por outra banda, os populares insisten en incrementar as axudas a autónomos, empresarios e veciños “ata polo menos un millón de euros”, o dobre do proposto polo Goberno porque ao entender do PP “cun orzamento de 22 millóns de euros non é de recibo destinar tan só un 2% a axudas”.

“Esperamos que tanto o Goberno local como o grupo ACIP coincidan connosco en ampliar esta axuda ata un millón de euros” e acusan aos independentes liderados por Juan Carlos González Carrera, de “aliñarse” co alcalde “priorizando os intereses partidistas ao interese xeral dos nosos veciños”.