O Goberno Municipal do BNG e PSOE prevé aprobar no pleno do mes de maio o Plan Xeral de Ordenación Municipal (PXOM) cos cambios esixidos pola Xunta. Será a terceira vez que o goberno de coalición aprobe provisionalmente o PXOM coa intención de que a Xunta lle dea a súa aprobación definitiva. A última aprobación provisional realizouse a finais de 2019 cando no documento se introduciron os cambios esixidos pola Xunta a comezos de 2017. Porén, a administración autonómica, ao revisar o documento volveu formular numerosas obxeccións e reparos que obrigaron a revisar de novo o documento.
Diante dese novo bloqueo, Concello e Xunta acordaron a comezos de 2020 realizar un traballo coordinado entre os técnicos municipais, a empresa redactora do PXOM e os técnicos da Xunta para que o documento definitivo atendese todas as esixencias da administración autonómica. “Queríamos seguridade xurídica para evitar o acontecido nas dúas ocasións anteriores nas que os cambios introducidos por esixencia da Xunta non foron despois validados”, explica a alcaldesa en funcións, Cristina Fernández Davila. “Agora, co método empregado –engade–, consideramos que non hai marxe para novas sorpresas e que o PXOM será aprobado definitivamente pola Xunta, pois o documento modificouse tal e como se nos indicou”.
En todo caso, Cristina Fernández Davila non contempla outra posibilidade “que a aprobación definitiva pola Xunta nun prazo moi curto e antes de que conclúa o verán”.
O executivo ponteareán e o equipo redactor do Plan mantiveron unha reunión este venres cos grupos municipais e entregáronlle o novo documento cos cambios esixidos pola Xunta.
O Goberno Municipal é optimista, pois nas reunións mantidas coa Dirección Xeral “observamos unha clara vontade de sacar adiante un Plan que non pode agardar máis tempo”, sinala a segunda tenente de alcalde, a socialista Chus Garrote.
Ponteareas ten suspendido o seu planeamento dende o ano 2002. Entre ese ano e o 2015, cando se produciu o cambio de goberno, unicamente se realizou unha aprobación inicial. Dende o 2015, o goberno de coalición aprobou por dúas veces o PXOM, pero a Xunta de Galicia, que ten a última palabra, rexeitouno nas dúas ocasións. A aprobación prevista para o mes de maio será a terceira nos últimos cinco anos e goberno local confía en que se trate da última e definitiva.
