Ponteareas conta dende esta mesma semana cun novo aparcadoiro disuasorio na rúa das Mimosas, un espazo de preto de 2.000 metros cadrados con 61 novas prazas co que o Concello amplía a rede de estacionamentos disuasorios gratuítos na vila.
A través dun convenio dunha cesión privada, con este novo aparcadoiro situado na contorna da Avenida de Castelao, unha zona moi comercial e con numerosos negocios do sector da hostalaría, o Concello “dá resposta á petición veciñal de dispoñer de máis prazas de estacionamento para realizar compras, acceder á zona peonil e mesmo dar apoio á zona escolar próxima”, como salienta a alcaldesa en funcións, Cristina Fernández.
Trátase da primeira fase de posta en marcha dun novo aparcadoiro na rúa das Mimosas e da estratexia seguida dende o Concello para ampliar a oferta de estacionamento disuasorio gratuíto no centro urbano “que axuden a deixar o coche, fomentando a comodidade de veciñanza e visitantes e favorecendo a mobilidade a pé con percorridos que en moi poucos minutos nos permiten chegar a calquera punto do núcleo de Ponteareas”.
