Ponteareas pecha o mes de febreiro cunha nova sesión de lecer ao abeiro do Cultura24, un programa posto en marcha “para achegar a actividade cultural a cada recuncho da nosa vila, enchendo de máis vida as nosas parroquias e poñendo en valor e promocionando a arte das asociacións musicais, teatrais e culturais de Ponteareas ”, como sinala o concelleiro de Cultura, Fernando Groba.
Esta fin de semana a axenda do Cultura24 chega con ‘Maxia familiar’ da man de Ian&Elisa ao Centro Cultural de Celeiros. Será un espectáculo no que maxia e ilusionismo mesturaranse con outras técnicas para mergullar a nenos, nenas e maiores nun mundo imaxinario no que nada e imposíbel. A actuación será o domingo 26 de febreiro ás 17.30 horas de balde e con entrada libre ata completar aforo.
Groba convida a todas e todos os ponteareáns “a achegarse ata Celeiros para vivir unha nova tarde de lecer ao abeiro do programa Cultura24, que ofrece un amplo abano de actuacións gratuítas coas que ao mesmo tempo dinamizamos as nosas 24 parroquias”.
