O Concello de Ponteareas iniciou as obras de transformación da rúa Trobador Xoán García de Guillade, que se converterá nun espazo público de calidade para as persoas. Os traballos abranguerán algo máis dun quilómetro e permitirán crear o primeiro espazo escolar seguro da vila ata o CEIP Ramiro Sabell e triplicarán o espazo para a veciñanza. “Esta actuación transformará por completo un longo percorrido moi utilizado por escolares, deportistas e persoas para o paseo, converténdoo nun espazo seguro, atractivo, sombreado e amábel”, salienta a alcaldesa, Cristina Fernández Davila.
As obras teñen un prazo máximo de execución de 8 meses e nelas invístense case 731.000 euros financiados nun 75% a través do plan ReacPon da Deputación de Pontevedra e nun 25% con fondos propios do Concello. O proxecto permitirá conectar a pé o centro urbano con parroquias como Fontenla e Arcos, e mellorará o tramo da rúa Nardos entre Xoán Trobador e o Paseo Matutino, así como nesta última rúa entre a saída de Nardos e a entrada a Feliciano Barrera, onde se atopan os institutos Val do Tea e Pedra da Auga.
A rúa Trobador Xoán García dende a Avenida de Galicia até o parque Ferro Ucha, de 200 metros, será de uso peonil en plataforma única para o paseo e a estancia, con abundante arborado e mobiliario e circulación de vehículos a motor reducida a residentes, garaxes e servizos.
“Esta obra vai transformar de xeito extraordinario unha rúa e unha estrada degradada, con beirarrúas estreitas, sen arborado e inhóspita, nun espazo público de calidade para o paseo, o desprazamento a pé e a relación social”, salienta o concelleiro de Mobilidade, Roberto Mera.
As persoas que desexen facer consultas ou expoñer incidencias poderán facelo ben enviando un correo electrónico a mobilidade@ponteareas.gal ou ben chamando ao teléfono 986 64 00 00.
