Tres persoas precisaron de asistencia sanitaria tralo incendio que se produciu nun edificio da céntrica rúa Rosalía de Castro de Ponteareas. Dúas das persoas tiveron que ser trasladadas ao centro sanitario de referencia e unha terceira puido ser atendida no mesmo lugar do suceso polos profesionais sanitarios.
Segundo informaron os Bombeiros de Ponteareas, o incendio produciuse no segundo andar dun edificio de catro plantas, situado na Avenida Rosalía de Castro, suceso que fixo preciso desaloxar aos veciños dos pisos superiores do edificio mentres os profesionais traballaban na extinción do lume.
As lapas consumiron, na súa totalidade, o dormitorio da vivenda ainda que toda ela resultou moi afectada polo fume. O lume fixo que caira parte da placa do teito o que impedirá que, tanto os ocupantes da vivenda sinestrada como as do andar superior, pasen a noite no seu domicilio.
O 112 Galicia tivo constancia do lume pasados uns minutos das catro desta tarde, grazas á chamada de varios particulares que indicaban que vían saír fume e lapas pola fiestra dunha vivenda. Ademais, algún dos alertantes aseguraba que se escoitaban berros dunha muller pedindo axuda nun balcón.
A partir de aí, desde o 112 Galicia informouse decontado aos membros do GES-SPEIS de Ponteareas, á Policía Local e aos efectivos de Protección Civil da localidade. Tamén os Bombeiros do Porriño foron informados, por se fose necesario prestar apoio aos compañeiros de Ponteareas. Igualmente, pasouse aviso ao Servizo de Urxencias Sanitarias de Galicia-061.
Tras apagar o lume e ventilar a zona, os bombeiros de deron por rematada a súa intervención. A rápida intervención dos efectivos do parque de Bombeiros de Ponteareas, foi determinante á hora de que o sinistro quedara cinguido ao piso onde se produxo o incendio e non afectara a outras vivendas do edificio.
