Un incendio no almacén dun establecemento comercial obrigaba á Policía Local de Ponteareas e como medida de precaución, a desaloxar un edificio do Paseo Matutino. Cara ás 8 da mañá, un particular daba o aviso ao 112 Galicia que, a súa vez, alertaba aos bombeiros de Ponteareas.
O lume foi debido, segundo os primeiros datos, a un fallo eléctrico no local e a fumareda foi a que fixo necesaria a evacuación das vivendas ata a completa extinción do fogo.
O Paseo Matutino, durante ese tempo, estivo pechado á circulación derivándose o tráfico a través da Avenida de Galicia. Pasadas as 10:30 horas, os bombeiros confirmaban que o lume estaba totalmente extinguido e os veciños e veciñas puideron voltar aos seus fogares. Minutos despois restablecíase a circulación nese primeiro treito do Paseo Matutino.
