O Grupo Municipal do PP agradece a actuación da Xunta de Galicia na PO-403, que vai de Ponteareas a Salvaterra, concretamente no cruzamento coa N120 ou tamén coñecido como cruzamento de Mondariz.
Os populares lembran que hai uns meses a Xunta xa actuara nese punto da estrada para dotar de novas beirarrúas nun tramo onde non existían, ademais de colocar unha varanda que favoreceu a seguridade peonil nese lugar.
Agora, procédese a reparar un tramo de 200 metros de beirarrúa existente e anexa á nova beirarrúa construída, que co paso dos anos deteriorouse principalmente porque o terreo cedeu rompendo a beirarrúa e as súas lousas por varios lugares ademais de xerarse unha diferenza de altura entre a beirarrúa e o acceso a vivendas e baixos comerciais, o que prexudicaba a accesibilidade peonil.
A actuación consiste na demolición e reposición do bordo e a demolición e reposición de 200 m2 de beirarrúa, e supón un investimento de máis de 7.000 euros por parte da administración autonómica no municipio de Ponteareas.
