8.5 C
Pontevedra
Venres, 29 de Marzo de 2024
Máis
    HomeO CondadoMondarizMondariz acolle a proxección dun documental sobre a Orquestra Mariño realizada pola...

    Mondariz acolle a proxección dun documental sobre a Orquestra Mariño realizada pola TVE-G no 2005

    O acto está organizado pola asociación ecocultural Búrbida

    Bautista Mariño, Farruco, finado no pasado mes de agosto, foi o fundador e alma mater da mítica Orquestra Mariño, unha presada de músicos que amenizaron coa súa música os palcos de Mondariz e de toda a comarca do Condado entre 1956 e 1984. En 2005 a Asociación de Veciños Xabriña promoveu a gravación dun emocionante documental a cargo de TVE que dirixiu con profesionalidade o xornalista Xan Touceda.

    Foi todo un éxito polo traballo dos instrumentistas e vocalistas, pero sobre todo porque escoitando o seu repertorio (Mujeres y vino, Todos queremos más, Caballito bandolero…) aqueles músicos conseguiron transportar ao auditorio á súa mocidade, aos mellores anos da súa vida.

    Como queira que van xa 16 primaveras da súa emisión, a Asociación Ecocultural Búrbida púxose en contacto con Televisión Española para solicitar permiso para a súa proxección o vindeiro venres, día 17. TVE en Galicia accedeu á petición da asociación e dixitalizou o documental, para que puidese ser visto por todos os veciños e veciñas de Mondariz.

    O traballo de TVE-G que se vai proxectar grazas á iniciativa e interese da Asociación Ecocultural Búrbida, é un valioso documento para a historia de Mondariz, onde poderemos ver a moitos veciños e veciñas que xa non están entre nós: Bautisma Mariño, a meirande parte dos seus músicos, o cronista Xoán Xosé Pérez Labaca, etc.

    A asociación lembra, como todo acerto, que “coidar a nosa memoria, protexela, escribila, conservala, é propio dos seres humanos civilizados, porque así o pasado nunca pasa e somos conscientes do que fomos, do que fixemos e, só así, poderemos ser mellores no futuro”.

    A Asociación Ecocultural Búrbida quere dar a grazas a Bautista Mariño e á súa familia. “Tamén aos seus músicos: Aparicio, Pucho, Suso de Diego, Tonio de Balbina, Blanco, Táboas, Videira, Sito, Tuno, Manolo e Manolito. Sodes, para sempre, unha parte da banda sonora da nosa vida”.

    A proxección, que terá lugar o venres día 17 ás 21 h, no auditorio do Centro Social de Mondariz, conta coa colaboración do Concello de Mondariz.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.