Salceda apela á colaboración veciñal ante unha ‘gamberrada’ transformada nun perigo para seguridade cidadá

O perigo que supoñen arquetas abertas como as da imaxe, é evidente e é imprescindible a colaboración cidadá para acabar con estes actos que van máis aló dunha simple gamberrada

O Concello de Salceda está a sufrir, nestes últimos días, un acto que vai máis aló do gamberrismo e chega a ser unha ameaza para a seguridade pública e para a propia integridade física de peóns e condutores. Nas última horas, aparecían varias arquetas abertas en moi diferentes puntos do concello co perigo evidente que iso supón.

O Concello solicita a colaboración cidadá porque, queda claro, que é materialmente imposible vixilar unha por unha os milleiros de rexistros que existen en todo o concello e que, con estas actides incívicas propias de xentiñas de cabeza baleira, poñen en perigo a toda a cidadanía.

De momento un vehículo que meteu unha roda nun rexistro e unha señora maior que caiu, afortunadamente sen consecuencias, son o balance deste acto vandálico. Pregúntase o Concello que pasaría se cae un neno pequeno que polo seu tamaño entra enteiro dentro da arqueta.

As veces, e esta é unha delas, a sociedade ten que actuar en conxunto e unánimemente contra aqueles que, ‘por facer unha gracia’ poñen a todos en situación de risco. A participarción cidadá é unha ferramente imprescindible e fundamental en calquera administración municipal pero, lembremos, funciona en dobre sentido. A cidadanía ten dereito a participar nas decisións do Concello pero, ese mesmo dereito, leva aparellada a obriga de colaborar naquelas accións que poñen en perigo a seguridade de todos e todas.