O goberno de Salceda de Caselas acordou onte iniciar accións xudiciais para invalidar o voto dun concelleiro do Partido Popular, na oposición municipal, e poder sacar adiante o a creación da praza por concurso de Tesoureiro habilitado nacional tal e como establece o Real Decreto 128/2018 de 16 de Marzo de 2018.
Durante unha sesión plenaria celebrada o pasado luns, o edil Joaquin Núñez, que ademáis se presenta á reeleción como número dous do Partido Popular en Salceda, protagonizou un feito, que desde o goberno municipal, “considérase insólito na democracia: Votou en contra de nomear un tesoureiro habitado para non prexudicar ao seu irmán e fíxoo a pesar de varios informes técnicos, entre eles o da secretaria municipal, que consideraban que debia absterse”.
O seu voto en contra, en concurso co resto da oposición fíxose, segundo afirma o Executivo local, “para evitar que o seu irmán deixase de exercer o control como xefe do departamento de tesourería e tivese que volver realizar traballos de administrativo. O seu nomeamento como tesoureiro producírase en pleno municipal, cando gobernaba o Partido Popular na localidade”.
O goberno de Salceda puxo en marcha o nomeamento do novo tesoureiro para cumprir a lei e porque o departamento esta colapsado e necesita máis persoal, como o propio tesoureiro actual recoñeceu nos escritos enviados á concelleira de persoal.
Debido á maioría tan axustada do goberno municipal, de Movemento Salceda, o voto de Joaquin Núñez, “incumprindo a Lei que lle obrigaba a absterse porque o asunto estaba relacionado cun familiar en segundo grao, era decisivo en contra xa que a súa abstención, como debería terse producido, propiciaria que o asunto saíse adiante”.
Agora o goberno local recorrerá á Xustiza para que o voto do edil sexa invalidado e por tanto o acordo de nomear o tesoureiro habilitado nacional, sexa firme.
Aínda que durante anos o administrativo realizou a súa función no Concello sen tensións co goberno local, nos últimos meses, afirman fontes do Concello de Salceda de Caselas, “déronse algunhas dilacións inxustificadas en trámites que o tesoureiro interino achacou a falta de persoal entre outras cuestións, pero desde o goberno local vincúlanse un posible malestar do traballador coa decisión do Tribunal de Contas de esixir a este e outro funcionario, tamén irmán do concelleiro do PP, de devolver distintas cantidades cobradas indebidamente”.
