A alcaldesa accidental do Porriño, Lourdes Moure, acompañada polo concelleiro de Deportes, David Alonso, visitou na mañá de hoxe o campo de futbol do Folón para comprobar in situ as melloras demandadas polo presidente e directivos da S.D. Mosende. A principal reivindicación é retirar os postes metálicos que sosteñen as redes para evitar a saída dos balóns tras as respectivas porterías.
A proximidade deses postes ao terreo de xogo constitúe un risco. “O seu retranqueo é unha prioridade por razóns de seguridade que vai ser atendida de inmediato polo Concello”, sinalaron Lourdes Moure e David Alonso.
As obras do campo da S.D. Mosende veñen arrastrando problemas de planeamento dende que no ano 2014, “cos últimos gobernos do PP tanto en Porriño como en Deputación”, sinala o goberno porriñés, planificouse unha mellora que incluía a colocación do céspede sintético cun orzamento aproximado de 122.000 €.
Porén houbo que agardar dous anos para o remate das obras cando o proxecto foi retomado e axilizado polo primeiro goberno municipal de Eva García e con Manuel Carrera na concellería de Deportes. A estas alturas aínda quedan flecos por resolver como o retranqueo deses postes metálicos e tamén do muro de peche por un lateral do campo, donde hoxe estaban realizándose tarefas de desbroce e limpeza por personal do Concello de Porriño.
