O material humanitario recollido polo “Porriño Baloncesto Base” (PBB) no marco da campaña solidaria de Nadal saíu antonte do pavillón municipal do Porriño con destino a Bangui.
Este Nadal o PBB decidiu moverse polos nenos e nenas de Bangui, capital da República Centroafricana que, pola difícil situación que atravesa o país, enfróntanse a duras condicións de vida.
Pablo, socio do PBB e pai de dous dos seus xogadores, Xabi e Abel, está neste país por motivos laborais, participando como militar nunha misión da Unión Europea. Foi el quen lles trasladou aos seus compañeiros de club as duras condicións de vida que atravesa Bangui, e concretamente, o orfanato dun dos barrios máis deprimidos da cidade. Os máis pequenos que viven nel carecen do básico.
Durante a campaña instalouse no pavillón un punto de recollida onde todos os que quixeron contribuír deixaron as súas achegas: material escolar básico, xoguetes, roupa e calzado infantil e material deportivo.
Agora son os militares os que se encargan do transporte
Dende o club porriñés explicaron esta iniciativa solidaria nestes termos: “Como vivimos nun mundo global onde todo está conectado, non podíamos perder a chamada de Pablo. Os nenos necesitaban unha axuda que lles puidese enviar dende España e non o dubidamos, puxemos en marcha á Familia PBB”
“Todas as achegas suman por pequenas que sexan. O noso obxectivo era mellorar un pouco a vida destes nenos e que se sintan membros da familia PBB que non coñece fronteiras”, engadiu o club. Dende a directiva concluiron “agradecendo a solidariedade de todos e todas as persoas que se sumaron a esta campaña. Xuntos conseguímolo”.
