A Biblioteca Pública Municipal de Tui completa a súa oferta de actividades de Nadal este xoves, 2 de xaneiro, ás 17 h, cunha sesión de contacontos dirixida a bebés e nenos e nenas con idades entre 0 e 3 anos. Correrá a cargo de Migallas Teatro co titulo de ‘Os contos do chupete’.
‘Os contos do chupete’ é unha sesión de contos para bebés na que se integran música en directo, literatura infantil, expresión dramática e tradición oral. Os cativos poderán chuchar contos, canción e arrolos ata encher a barriguiña nesta proposta para bebés na que gozar en familia.
A actividade parte de que Bea ten un problema. O seu lobo leva chupete… Cada vez que llo intentan quitar, chora. Pero chora moito… a quen se lle conte, un lobo con chupete! Está desconsolado. Contos, cantos e cancións serán a solución.
É unha sesión de contacontos na que participan tanto os cativos e cativas como os seus pais e nais, pois está orientada para toda a familia.
A Concellería de Cultura tudense con esta actividade promovida pola Biblioteca Municipal, continúa desenvolvendo a súa aposta pola promoción e animación á lectura entre todos os segmentos de idade, neste caso para os usuarios máis cativos, para eles tamén hai sitio na Biblioteca Municipal.
