As concelleiras do Grupo Municipal Socialista no Concello de Tomiño, Violeta de Santiago e Mirta Misa, presentaron unha moción no Concello para esixir á Xunta de Galicia que o proceso de vacinación contra a Covid-19 das persoas maiores “fágase no Centro de Saúde da localidade a través dos equipos de Atención Primaria, tanto por cercanía coma polo contacto permanente para seguimento de patoloxías crónicas”.
As socialistas critican a medida adoptada pola Xunta de Galicia de vacinar ás persoas maiores de Tomiño no hospital Álvaro Cunqueiro de Vigo, xa que “supón un trastorno innecesario ademais de implantar, na práctica, un copago para poder recibir a vacina xa que están obrigados a pagar o custe do longo desprazamento e aparcadoiro do hospital, co que a gratuidade da prestación deixa de ser tal”.
A todo isto engádese que estanse a rexistrar “longas colas de usuarios e usuarias tanto nos aparcadoiros como no propio hospital, o que supón unha dificultade engadida para as persoas usuarias así como a familiares e/ou acompañantes”, explican.
Violeta de Santiago, voceira do Grupo Municipal Socialista, cualifica esta medida de “novo castigo da Xunta de Galicia á cidadanía”, porque “afasta dos veciños e veciñas de Tomiño dun servizo básico dificultándolles gravemente o acceso a unha prestación á que teñen dereito de maneira gratuita”, e recalca que “non se pode xogar coa saúde dos nosos veciños e veciñas dende a improvisación e a frivolidade” afirma con rotundidade.
Por todo isto o grupo municipal do PSdeG de Tomiño ven de solicitar ó Pleno do Concello, instar á Xunta de Galicia a que modifique o modelo e todas as persoas maiores sexan vacinadas no seu Centro de Saúde ou PAC de referencia.
