8.3 C
Pontevedra
Xoves, 28 de Marzo de 2024
Máis
    HomeBaixo MiñoTomiñoO alumnado do IES Antón Alonso Ríos mergúllase na ciencia

    O alumnado do IES Antón Alonso Ríos mergúllase na ciencia

    O centro organizou a segunda edición do seu Congreso Científico

    O IES Antón Alonso Ríos segue a dar pasos para achegar ao alumnado un espazo motivador no que compartir intereses, xerar experiencias motivadoras que fomenten a investigación e que esperte vocacións científicas. A semana pasada o centro celebrou a segunda edición do seu Congreso Científico, un encontro organizado polos departamentos de Bioloxía e Física e Química co que se busca mergullar ao alumnado no traballo e no método científico dunha forma directa, amena e divertida.

    Emulando un congreso real, durante catro días o alumnado de 3º e 4º da ESO presentou ao resto de participantes os traballos realizados ao longo do ano nas aulas tanto en formato póster como en comunicacións orais máis extensas. “Queremos que coñezan de primeira man como funciona unha investigación. Por iso o equipo docente imos guiando as preguntas de partida, xa que moitas veces as que se propoñen son imposibles de contestar cos medios dos que dispoñemos, como: hai vida en Saturno?”, salientan dende a organización.

    Como explican “non queremos buscar bibliografía, senón facer un traballo de investigación, propoñendo hipóteses simples e buscando experimentos que lles que permita confirmala ou rexeitala”. Os resultados expóñense en sesións nas que se xera debate e experiencias motivadoras que fomentan a curiosidade investigadora e dan pulo a novas vocacións científicas.

    O congreso contou cun completo programa de actividades con conferencias e talleres a cargo de persoas de gran relevancia no mundo científico “para falar sobre a súa experiencia profesional ou sobre algún tema de importancia e actualidade”. Así, contaron coa participación de José Benito Vázquez Dorrio, catedrático e profesor do departamento da Física Aplicada da Universidade de Vigo, e de Isabel Pastoriza, profesora do departamento de Química Física da Universidade de Vigo. Tamén recibiron unha charla da Axencia Galega de Doazón de Sangue e Órganos e puideron gozar dun obradoiro de fotografía de natureza coa profesora do IES tomiñés Laura Lago, experta en bolboretas.

    “Para o Concello é un orgullo ter un instituto tan implicado co futuro de Tomiño e un alumnado innovador, con inquietudes e intereses, capaz de esforzarse para poñer en marcha un congreso deste calibre. Moitos parabéns a todos e todas por unha iniciativa que sen dúbida fará que moitos rapaces e rapazas se acheguen á ciencia dun xeito diferente, ameno e divertido, espertando novas vocacións”, salientou a alcaldesa, Sandra González.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.