Máis de 400 persoas maiores de Tomiño recibirán por correo unha postal personalizada de Nadal e Aninovo, remitida por un dos alumnos ou alumnas dos coles de Primaria e do Instituto de Secundaria da vila.
O Consello da Infancia e Adolescencia Voces Novas de Tomiño, organizou a escritura e recollida das misivas, así como o envío a través de correo postal. Un traballo enorme que non sería posible sen a participación e colaboración de moitas persoas.
Trátase dunha práctica que naceu o ano pasado por mor da pandemia e o confinamento, e neste Nadal volve saír ás rúas con máis forza e implicación, tanto do Consello da Infancia e Adolescencia, como dos centros educativos. A concelleira de Eurocidade, Mocidade e Participación infantil, Fátima Rodríguez, agradece a participación dos centros de ensino de Primaria e Secundaria do concello (CEP Pedro Caselles Beltrán, CEIP Pintor Antonio Fernández, CEIP de Sobrada, CEIP de Tebra, CEIP de Barrantes e IES Antón Alonso Ríos), que crearon a través do seu alumnado máis de 400 tarxetas de Nadal pintadas, decoradas con diferentes técnicas e nas que se incluíron ademais, mensaxes personalizadas para cada unha das persoas que viven nas residencias ou maiores que residen nas súas vivendas de Tomiño.
As tarxetas están sendo ensobradas esta semana pola propia concelleira e pola coordinadora do consello. Os sobres, con logo do Concello de Tomiño e de Voces Novas portan ademais das tarxetas, unha carta da alcaldesa Sandra González, explicando a iniciativa. “A mensaxe que vostede ten nas mans foi feita con agarimo e ilusión por un neno ou nena do noso concello, e sabemos que a eles haberá de gustarlles recibir resposta”, comenta a rexedora, animando ás persoas maiores a respostar.
Tomiño é unha das 10 Cidades Amigas de Infancia recoñecidas en Galicia por UNICEF. Un dos requisitos para conseguir esta distinción foi xustamente, ter un Consello da infancia e adolescencia, comprometido co pobo e cos ODS (Obxectivos de Desenvolvemento Sostible) das Nacións Unidas, que inclúen desde a eliminación da pobreza até a loita en contra do cambio climático.
