O Concello de Oia mellorou a súa oferta de lecer grazas a dúas achegas da Deputación de Pontevedra por valor de 80.000 euros ao abeiro do Plan Concellos. As obras fixeron posible a mellora do parque infantil de Viladesuso e tamén do campo de fútbol das Tornas. Os deputados provinciais de Cooperación, Santos Héctor, e de Cohesión Social, Olga García, visitaron hoxe as actuacións xunto coa alcaldesa Cristina Correa e o concelleiro José Manuel Rodríguez.
Santos Héctor felicitou a alcaldesa de Oia por destinar fondos do Plan Concellos á mellora das instalacións deportivas do campo de fútbol das Tornas, “porque son obras nas que se ve que a inversión é útil para os veciños e veciñas”. “O deporte é un dos piares mais importantes para a Deputación e este campo das Tornas ten unha intensa utilización por nenos e nenas, pero tamén por varios equipos e tamén polos/as veteranos/as”, subliñou o deputado provincial. O responsable provincial da área de Cooperación engadiu que o papel da Deputación consiste en achegar os fondos para que os concellos poidan realizar todo tipo de obras, entre elas as que teñen que ver coa mellora das infraestruturas deportivas “e así favorecer que a veciñanza poida gozar delas e manter un estilo de vida saudable”. Santos Héctor amosou tamén o seu orgullo de ver que o parque infantil de Viladesuso conta agora “cunhas solucións técnicas importantes”, que xa están a ser utilizadas polos seus nenos e nenas, pero tamén polos seus mozos e mozas.
Pola súa banda, Cristina Correa destacou o seu interese por continuar facendo este tipo de obras: “Seguiremos utilizando o Plan Concellos para mellorar os espazos públicos e cubrir as demandas da veciñanza”. A alcaldesa subliñou que estas reformas permitiron “atender á demanda da veciñanza e do club” e gozar duns espazos públicos renovados. Correa destacou tamén a reforma do parque de Viladesuso, “que constitúe a área infantil máis importante do concello”, e que favorece que a xente de Oia poida “gozar ao aire libre, agora que temos que primar eses espazos”.
No parque de Viladesuso, que levaba un tempo pechado debido ao seu mal estado, obrouse para a súa reforma e mellora integral. Estas actuacións permitiron o seu acondicionamento coa substitución dos xogos infantís deteriorados, a incorporación de novos elementos, a substitución do seu céspede artificial e o reacondicionamento e ampliación da súa pérgola, entre outras. Amais, permitiron facer fronte as augas pluviais, que antes das obras se estancaban entre o céspede artificial e a zona de xogos.
En canto, ao campo de fútbol As Tornas acometeuse unha ampliación dos vestiarios, dando resposta ás necesidades do campo de fútbol oiense, que alberga hoxe todas as categorías do seu club de fútbol, equipos veteranos/as, nenos e nenas da escola de fútbol e, ocasionalmente, afeccionados, torneos amistosos e incluso campamentos de verán. Ata o de agora, o campo dispuña dunha pequena edificación con dous vestiarios para equipos, dous para árbitros e un pequeno vestiario-aseo adaptado para persoas con diversidade funcional. A ampliación fixo posible a posta en servizo de dous novos vestiarios para os equipos e un terceiro para os árbitros/as, que abranguen unha superficie de case 80 metros cadrados. Con esta mellora facilítase a celebración de encontros simultáneos ou o “impasse” entre uns e outros. A maiores, as obras permitiron dispoñer dunha nova rede de recollida de balóns e de dúas porterías regulamentarias de fútbol 7 abatibles de aluminio.
A Deputación de Pontevedra ten investido en Oia máis de 3,8 millóns de euros desde que se produciu o relevo á fronte do Goberno provincial en 2015. Estas achegas fixeron posible o desenvolvemento de máis de 30 actuacións, entre as que destacan obras de mellora de camiños e infraestruturas, saneamento ou a rede de abastecemento; así como a contratación de máis de 52 persoas desempregadas para a prestación de servizos municipais. Este 2021, a institución provincial destina ao municipio do Baixo Miño 783.000 euros ao abeiro do Plan Concellos.
