Xa están abertas as inscricións para a 15 K Atlántico Banco Mediolanum que se disputará o vindeiro día 3 de outubro. A participación está limitada a un máximo de 500 prazas, que son as dispoñibles debido ao ríxido control sanitario que se aplica na proba.
Desde Oia ata A Guarda a carreira cumprirá unha nova edición, o que supón o regreso á actividade despois do parón forzoso do ano pasado. Esta proba xa pode considerarse como emblemática polas súas características e tamén pola contorna paisaxística pola que discorre.
Establecéronse varias categorías. Absoluta, promesa júnior, sénior e master A, B e C. A saída realizarase no campo de fútbol de Oia e a chegada será no porto da Guarda. Precisamente desde o museo do mar desta vila sairán os autocares para levar a aqueles participantes que o soliciten ata o punto de saída. Os organizadores tamén estableceron, o mesmo que en edicións precedentes, dous puntos de avituallamiento líquido ao longo do percorrido e outro máis na chegada. Ademais, celebrarase unha andaina de 12 quilómetros na que poderán participar 100 persoas.
As inscricións pódense realizar na páxina web bancomediolanum15kseries.com Aceptaranse todas as peticións ata chegar ás 500 prazas dispoñibles de atletas que nacesen en 2005 ou anos anteriores. Un euro de cada inscrición doarase á entidade Bicos de Papel, asociación que traballa con nenos oncolóxicos. Tamén haberá unha fila cero para recibir doazóns.
