O programa ‘Primavera na Praza’ continúa esta fin de semana no Rosal cunha nova actividade coa que “continuar compartindo espazos de lecer, de convivencia e de encontro social para gozar do noso concello”, como explica a alcaldesa, Ánxela Fernández Callís.
Este sábado 6 de maio nenos e nenas serán as grandes protagonistas da xornada coa posta en escena do espectáculo infantil ‘Pinga a pinga’, de Barafunda Animación, unha obra de concienciación no que a cativada aprenderá dun xeito divertido e entretido como facer un bo uso da auga.
Da man do doutor Fauchis e do seu axudante, o pallaso Lolo, rapaces e rapazas coñecerán consellos moi doados e sinxelos ao alcance de todos e todas cos que facer un uso responsable da auga. Cunha linguaxe accesible e directa, a obra amosará a nenos e nenas pequenas accións que poden ter un grande impacto na preservación dun dos recursos máis preciados do planeta.
A representación será ás 12.00 horas na Praza do Calvario de balde. En caso de choiva, o espectáculo trasladarase aos baixos da Liga de Amigos.
