21.6 C
Pontevedra
Mércores, 7 de Xuño de 2023
Máis
    HomeComarcasA ParadantaO Baixo Miño e o Condado-Paradanta apostan pola rede 'Ágora' da Deputación...

    O Baixo Miño e o Condado-Paradanta apostan pola rede ‘Ágora’ da Deputación para recuperar espazo público para as persoas reducíndollo aos coches

    Formalizaron a súa participación no programa do departamento de Mobilidade 44 dos 61 concellos da provincia

    Tres de cada catro municipios da provincia, un total de 44, formalizaron a súa adhesión á rede ‘Ágora’ de concellos pola recuperación do espazo público impulsada pola Deputación. Trátase dun proxecto do departamento de Mobilidade que ten como obxectivo que os municipios da provincia multipliquen o espazo destinado ás persoas nas vilas, cidades e calquera núcleo de poboación reducíndoo aos vehículos a motor.

    O deputado Uxío Benítez, promotor da iniciativa, acompañado de persoal do seu departamento, e da secretaria técnica da Rede de Cidades que Camiñan, Ana Montalbán, destacou hoxe a súa satisfacción pola boa acollida do modelo. Lembrou que no mes de maio se fixo unha presentación aos concellos, aos que se lles deu de prazo ata o 15 de setembro para formalizar oficialmente a adhesión. “O resultado é máis que satisfactorio pola nosa parte. Entendemos que é un grande éxito de participación e de acollida. Veremos de agora en diante, xa que o compromiso é incrementar o espazo público para as persoas (…), e en xuño de 2023 temos que demostrar con datos que Ágora serviu para algo”, afirmou.

    O nacionalista salientou que hai comarcas nas que practicamente se adheriron todos os concellos e outras nas que case a súa totalidade. Explicou que en Ágora están presentes concellos máis urbanos con máis poboación, e máis rurais e con menos poboación. “Sempre dixemos que os principios Ágora, a súa filosofía, pode implantarse en calquera tipo de concello sexa cal sexa o seu tamaño. Ese vai ser un dos retos e queremos demostralo con feitos de aquí a tres anos”, afirmou.

    No caso da comarca do Baixo Miño a adhesión foi total, xa que aprobaron en Pleno ou por Xunta de Goberno os principios da rede e a adhesión: Tomiño, O Rosal, Tui, A Guarda e Oia. No caso do Condado-Paradanta aprobaron formalmente a participación no proxecto os municipios de Ponteareas, As Neves, Salvaterra, Arbo, Covelo e Crecente.

    A inclusión na ‘Rede Ágora’ suporá para os concellos a participación en programas e axudas provinciais, a recepción de asesoramento por parte de persoal especializado, a captación de recursos externos para financiar proxectos (nomeadamente fondos europeos), a representación nas redes ‘Cidades que Camiñan’ e ‘Cidades pola Bicicleta’), a participación en cursos, conferencias e exposicións, así como no impulso en accións de sensibilización nos centros educativos. 

    Benítez lembrou que acaba de rematar a Semana Europea da Mobilidade e subliñou que “hai que dicir que neste recuncho de Europa naceu unha iniciativa que vai ser exitosa e nós pasamos a unha seguinte fase que é lanzar iniciativas para conseguir os obxectivos”.

    Algunhas desas iniciativas previstas para os vindeiros meses son a creación dun Consello Asesor participado por profesionais de recoñecido prestixio, a realización de liñas de subvencións para proxectos de recuperación do espazo público, a creación dunha ‘Facultade Ágora’ para formación de persoal técnico, unha mesa de traballo,  así como a celebración dun Congreso Internacional e os Premios Ágora ás mellores intervencións no espazo público da provincia.

    Actuacións urxentes pola COVID-19

    Ademais do proxecto Ágora, o deputado de Mobilidade tamén confirmou que os técnicos provinciais xa teñen visitado máis de 15 concellos da provincia que pediron asesoramento para implantar políticas e actuacións tácticas urxentes de ampliación do espazo público a raíz da situación motivada pola crise COVID-19.

    “Consideramos que a situación da COVID favorece que se poidan ir implantando este tipo de políticas tanto sexa con carácter temporal e urxente ou carácter definitivo. O persoal técnico revisou cales son as estratexias de cada un dos concellos para as vindeiras actuacións a realizar”, explicou citando nomeadamente os concellos de Ponteareas, A Estrada, Bueu ou Moaña, pero lembrando que “cada concello ten os seus ritmos e a súa estratexia, e nós damos apoio técnico e empuxe, sempre respectando a autonomía municipal porque cada concello é soberano”, insistiu.

    Benítez subliñou que dende o confinamento houbo certa relaxación sobre as medidas a adoptar, mais agora parecen ser novamente necesarias. “O que si quedou claro é que se tivesemos unhas vilas, unhas cidades e unhas parroquias nas que houbera máis espazo público para as persoas seguramente levariamos mellor o tema da COVID. Penso que iso é unánime e axuda a todas estas políticas que pretendemos implementar”, dixo, ao tempo que tamén fixo referencia a toda a dinámica europea e a estratexia de aposta pola economía baixa en carbono.

    Rede de Cidades que Camiñan

    O deputado de Mobilidade explicou tamén que hoxe se celebrou unha reunión técnica coa secretaria técnica da Rede de Cidades que Camiñan, unha entidade da que a Deputación forma parte dende principios de verán, e de forma automática os concellos incorporados a Ágora. Subliñou que a de Pontevedra é primeira deputación que entra a formar parte e insistiu en que é preciso traballar en conxunto para “crear un estado de opinión sobre a importancia de conseguir municipios máis camiñables”.

    Pola súa banda, Ana Montalbán, agradeceu que a Deputación se teña integrado á Rede de Cidades que Camiñan e felicitou ao deputado pola iniciativa de Ágora, “xa que nos parece un proxecto fantástico e unha maneira moi interesante de investir o diñeiro público en proxectos que vaian a favor da camiñabilidade e da recuperación do espazo público para as persoas”. Destacou que os 10 principios de Ágora son practicamente os mesmos que os da Rede “por iso cremos que a nosa colaboración é moi interesante”. Montalbán tamén sinalou que a adhesión da Deputación á Rede de Cidades que Camiñan non é simplemente nominal, “senón que entrou con forza” e está traballando por sacar adiante iniciativas como a campaña de ‘Cidade 30’ e tamén para influír na Lei de Mobilidade que “na que non queremos que os peóns sexamos un referentes no texto, pero esquecidos na práctica”.

    COLABORACIÓNS

    Pilar Pallarés, «Unha boa gatucada!»

    A primeira incursión de Pilar Pallarés na literatura infantil e xuvenil resultou ser unha grata sorpresa, unha colección de poemas (en realidade un longo poema narrativo fragmentado), que ten como protagonistas un grupo de gatos que conviven cunha humana.

    Aperitivos de hojaldre sin gluten

    Mayo es el mes de las personas celíacas. El día 16 se celebró el Día Internacional de la Enfermedad Celíaca y hasta este año, el 27 de mayo se celebraba en España el Día Nacional (este año nos unimos al resto de los países y lo celebramos el día 16).

    Ponteareas diante das eleccións (II): a Xeración do cambio, un recordo para que a Historia non se repita

    “De onde vimos? quen somos? onde imos?”. O título do cadro de Paul Gauguin e a letra da coñecida canción de Siniestro Total son interrogantes filosóficos que, aplicados ao mundano proceso electoral no que estamos inmersos, serven para lembrarnos que os procesos histórico-políticos son dinámicos e, polo tanto, teñen unha xénese no pasado que explica un presente que, á súa vez, condicionará o futuro decorrer dos acontecementos. A recente historia de Ponteareas non é unha excepción e, a poucos días das eleccións municipais, convén lembrala para non estar condenados a repetila.

    Ponteareas diante das eleccións (I): David contra Goliat e a utopía feita realidade

    Botando unha ollada atrás un non pode deixar de sorprenderse da rapidez coa que transcorre o tempo e a vida. Unha velocidade vertixinosa que tamén acompaña aos acontecementos e procesos sociais e políticos e que explica a facilidade coa que a sociedade pode esquecer tan axiña o seu pasado e, sobre todo, en política, ignorar de onde vimos, onde estamos e cara onde nos diriximos. Esquecemento dos que viviron eses procesos, mais tamén descoñecemento comprensíbel por razóns biolóxicas e xeracionais dos que daquela non naceran ou eran uns cativos.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    84 POSTS0 COMMENTS
    Paz de la Peña
    42 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    8 POSTS0 COMMENTS
    Avatar
    1 POSTS0 COMMENTS