19.4 C
Pontevedra
Xoves, 29 de Setembro de 2022
Máis
    HomeBaixo MiñoA GuardaA Xunta de Galicia segue evitando afrontar os problemas sanitarios da Guarda

    A Xunta de Galicia segue evitando afrontar os problemas sanitarios da Guarda

    A Atención Primaria na Guarda segue esquecida por parte da administración sanitaria galega

    Nun clima de crispación xeneralizado da cidadanía ante un evidente deterioro da Atención Primaria, puidera puidera parecer que A Guarda non é máis que outro municipio que se suma ás reclamacións, tan xustas como necesarias, de unha sanidade digna para a súa veciñanza. Pero, se se analiza con máis detemento, chégase á conclusión que o municipio ten unhas características particulares, determinadas pola súa propia situación xeográfica, que fan moito máis evidentes esas carencias sanitarias e, como consecuencia, moito máis perigosas.

    Se a deficiente atención sanitaria xa é palpable durante todo o ano, o é moito máis coa chegada do verán no que A Guarda, como municipio turístico que é e paso obrigado do Camiño Portugués pola Costa –que dende o seu recoñecemento oficial medra exponencialmente ano a ano–, duplica a súa poboación.

    O alcalde, Antonio Lomba, leva, dende hai meses (por non dicir anos), reclamando medios para un centro de saúde que a duras penas ‘mantén o tipo’ e, se o fai, tan só é debido á profesionalidade dos seus traballadores e que ten un persoal médico, cada día máis escaso e cada día máis presionado.

    “Falo a diario co persoal médico do centro de saúde –explica o alcalde guardés– e podo comprobar que, sobre todo nestas datas, teñen que atender a moitísimas persoas desprazadas co que iso supón de incremento de traballo para eles e elas nunhas condicións que sabemos que non son as máis favorables, máis ben todo o contrario”.

    As protestas e presión veciñal e as continuas denuncias da situación nos medios de comunicación –explica Lomba– “deron como resultado que a comezos de mes houbo un momento en que contamos co cadro de persoal médico completo”.

    Polo que parece, esa situación foi só un espellismo porque a golpe de xoves 19 de agosto, este xornal puido comprobar, in situ, que o Centro de Saúde da Guarda contaba tan só con 5 dos 8 médicos que ten asignados.

    A deputada no Parlamento de Galicia Leticia Gallego conversa con persoal médico do Centro de Saúde da Guarda en presenza do alcalde Antonio Lomba, durante unha das visitas que realizou ao municipio para dar a coñecer as iniciativas parlamentarias presentadas sobre a situación sanitaria guardesa.

    “A sobrecarga de traballo que teñen que soportar as e os médicos ao asumir as citas dos que faltan, tradúcese en menos tempo para cada paciente e deterioro da atención sanitaria que non é maior pola profesionalidade e celo do persoal sanitario”, asegura o alcalde guardés.

    Os novos médicos optan, ante a precariedade de condicións laborais –con contratos que poden as veces ser de poucos días ou incluso horas–, a quedarse nas grandes cidades onde, se as condicións contractuais non son mellores, si sofren menos presión á hora de desenvolver o seu traballo.

    A solución máis rápida, e pode que a máis doada para adoptar por parte da Xunta de Galicia, sería o que Antonio Lomba cualifica de “discriminación positiva para A Guarda”. “Posiblemente poñeríase fin á falta de persoal –apunta– se ás e aos médicos que veñen ao Centro de Saúde ofrecéranselles mellores condicións laborais, contratos de maior duración que lles dean unha maior estabilidade e puideran plantexarse seriamente vir aquí”.

    Cómpre lembrar que o PAC da Guarda asume tamén as urxencias do Rosal e de Oia, o que se traduce nunha complexa situación que explica Antonio Lomba cun exemplo ben aclaratorio: “ao non contar cun dobre servizo de urxencias durante todas as horas do día, as veces quedamos sen médico no PAC. O que non se ten en conta dende a administración sanitaria –continua o alcalde guardés– é que cando un médico ten que ir con un paciente a Vigo (ao Álvaro Cunqueiro que é noso hospital de referencia), tarda case que unha hora en ir e outra en volver, máis o tempo que teña que estar alí. Iso tradúcese en dúas horas sen médicos de urxencias que dan lugar a situacións críticas que non se converteron ata o de agora en desgracias, pero pode pasar en calquera momento”

    Antonio Lomba chama tamén a atención sobre a estreita relación que ten, no municipio, a sanidade coas comunicacións. “Non sei se haberá moitos casos en Galicia como o noso, creo que serán moi contados; non temos boas comunicacións, de feito son moi malas e lentas, e a única forma de paliar a situación sería cun Centro de Saúde con máis medios, cousa que tampouco temos”.

    A Guarda, situada nun enclave de auténtico luxo, balcón sobre o Atlántico e ao mesmo tempo sobre o Miño e a súa desembocadura, ve convertido ese enclave privilexiado nunha trampa á hora da asistencia sanitaria.

    A autocomplaciencia na que cae a administración sanitaria máis veces das que sería desexable, impídelle ver a realidade dunha situación que afecta a todas e todos os veciños sen distinción de cor político. Que a situación sanitaria da Guarda fora levada ao Parlamento de Galicia ata en tres ocasións non serviu, polo que parece, de nada.

    Queda tan só a protesta dun Concello e dunha veciñanza cada día máis indignada e a esperanza de que, nalgún momento, alguén visite a Guarda e sobre o terreo comprobe a realidade dunha situación que, día a día, agrávase e pon en entredito o principio recollido na Constitución que dí textualmente: “1. Se reconoce el derecho a la protección de la salud” e “2. Compete a los poderes públicos organizar y tutelar la salud pública a través de medidas preventivas y de las prestaciones y servicios necesarios. La ley establecerá los derechos y deberes de todos al respecto” (Título I: De los derechos y deberes fundamentales. Capitulo Tercero: De los principios rectores de la política social y económica. Artículo 43).

    COLABORACIÓNS

    Heterodoxos

    A editorial Galaxia vén de sacar do prelo unha nova colección que, baixo a denominación xenérica de «Heterodoxos», pretende darlle voz a autores ou obras que, polas súas peculiaridades, non teñen cabida dentro das coleccións habituais das editoriais.

    Teatro para nen@s

    Sempre fun dos que defenden a valía do teatro como asignatura en todos os niveis da educación. Polas súas evidentes compoñentes pedagóxicas e pola súa capacidade para aprender a expresarnos en público e a empatizar con outros, tan distintos de nós, merecería un espazo de honra no noso curriculo educativo. Por iso non quero deixar pasar o inicio do novo curso escolar sen facer un par de recomendacións de pezas teatrais dirixidas aos máis pequenos da casa.

    Ramón D. Veiga, «Zoom»

    En ocasións, a literatura xorde dun puro divertimento, dun simple xogo que alicerza a escrita e do que o autor ou autora se fai partícipe dende o inicio. Hai exemplos numerosos ao respecto, ás veces concibidos como simples exercicios de estilo, outras, como argalladas transgresoras coas que experimentar un xeito determinado de escribir. O que hoxe traemos a este espazo parece encaixar perfectamente nese prantexamento lúdico.

    ¡Galicia negra!

    En estos últimos días, mejor dicho ya semanas, estamos volviendo a la cruda realidad de ver a nuestra Galicia de nuevo ennegrecida por el humo y por los incendios. No es algo que nos pille de sorpresa, por desgracia ya es algo habitual desde hace muchos años aunque, este año, se ha adelantando en el tiempo, ya que lo que solía ocurrir principalmente a finales de verano, debido a la climatología de este año, ya está sucediendo en estos meses.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    69 POSTS0 COMMENTS
    Paz de la Peña
    40 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    4 POSTS0 COMMENTS
    Avatar
    1 POSTS0 COMMENTS