O Concello da Guarda e a Câmara Municipal de Póvoa de Varzím comezaron a dar, este pasado mercores, os primeiros pasos do irmandamento entre ámbalas dúas localidades ou o que é o mesmo, facer oficial un sentimento de proximidade e vinculación existente dende hai anos, de xeito ‘non oficial’, entre as poboacións das dúas localidades.
Nesta xuntanza oficial estiveron presentes por parte da Guarda, o alcalde Antonio Lomba, e a tenente de alcalde, Montserrat Magallanes e, pola parte de Póvoa de Varzín, o presidente da Câmara municipal, Aires Henrique do Couto Pereira e o vicepresidente, Luís Diamantino Carvalho Batista.
A vinculación existente entre os dous municipios remóntase a moitos anos atrás, principalmente a través da actividade pesqueira, onde os mariñeiros refuxiábanse dos temporais de inverno cando saían a faenar nos portos destes municipios, establecendo fortes lazos de amizade e mesmo familiares, destacando moitos nexos de unión coma as marcas dos mariñeiros, os ditos e cancións populares ou a gran devoción existente entre os mariñeiros da Povoa pola Virxe de Santa Trega.
Representantes da Asociación Piueiro, fixeron unha proposta para a creación dunha Comisión Organizadora para o Irmanamento con Povoa de Varzim e esta foi ben recibida polas dúas vilas, iniciando dende xa os trámites para facer efectivo este irmanamento, que fixará as bases para futuras accións entre os dous municipios.
